Túrkistan oblysynda sý shaıyp ketken kópir kelesi jyly jańartylady
TÚRKІSTAN. KAZINFORM – Saýran aýdanynda aýa raıynyń qolaısyzdyǵyna baılanysty tótenshe jaǵdaıdyń aldyn alý baǵytyndaǵy jumys kúsheıtildi.
Buǵan deıin aýdanda qatty jaýǵan nóser saldarynan Jańaqorǵan ózenindegi sý deńgeıi kóterilip, Abaı men Kóksaraı aýyldaryn jalǵaıtyn kópirge zaqym kelgen bolatyn.
Saýran aýdany ákimdiginiń habarlaýynsha, ákimdik pen tótenshe jaǵdaılar departamenti mamandarynyń jedel áreketiniń arqasynda ózen arnasynyń jan-jaǵy qazylyp, ýaqytsha ótkel uıymdastyrylyp, eldimekende sý tasqynyna jol berilgen joq.
Osydan soń oblys ákimi Nuralhan Kósherov Abaı aýylyna baryp, jaýapty tulǵalarmen jáne turǵyndarmen kezdesti.
– Oblystaǵy sý nysandary men ózen-kólder turaqty baqylaýǵa alynǵan. Jaýapty mekeme ókilderinen kezekshilik uıymdastyrylǵan. Ózderińizben jolyǵyp, pikirlerińizdi tyńdaý úshin keldik. Osy aýyldaǵy ózenge túsken qys-kóktemgi qar men jaýyn-shashyn sýyn jınap, sý qoıma jasap, aýyl sharýashylyǵy maqsatynda paıdalaný máselesin zerdeleý kerek. Naqty usynys berińizder. Kópir bıyl jóndeledi, al kelesi jyly bul másele tolyq sheshilip, kópirdi jańartýdy josparlap otyrmyz. Másele tolyq baqylaýda tur, – dedi oblys ákimi.
Jalpy aýdan aýmaǵynda ahýal turaqty bolǵanymen, qaýipsizdikti qamtamasyz etý maqsatynda barlyq jaýapty qyzmet kúsheıtilgen rejımde jumys istep jatyr.
Qazirgi tańda aýdan ortalyǵynda jáne eldimekenderde arnaıy tehnıkalar jumyldyrylǵan. Atap aıtqanda, aýdan ortalyǵynda 2 júk tıegish kólik, 2 júk tasýshy avtokólik, 3 traktor, sýsorǵysh qondyrǵy, ÝAZ avtokóligi jáne mıkroavtobýs kezekshilikke qoıylyp, tótenshe jaǵdaı týyndaǵan jaǵdaıda jedel áreket etýge daıyn. Sonymen qatar aýdanǵa qarasty 12 aýyldyq okrýgtiń árqaısysynda 12 dana traktor jáne 12 dana júk kóligi ázirlikke keltirilgen.
Sonymen qatar Teke eldimekeninde qosymsha kúshter shoǵyrlandyryldy. Munda 3 júk tıegish kólik, 2 sý tasyǵysh kólik, ekskavator, traktor, medıtsınalyq avtokólik, «Nıva» avtokóligi, polıtsııa avtokóligi jáne avtobýs daıyndyqqa qoıylǵan. Budan bólek, 2 júk tıegish kólik, 2 júk tasýshy kólik, traktor jáne 2 ÝAZ avtokóligi jumyldyrylǵan.
Jalpy úsh aýyldy qamtıtyn arnaıy jedel áreket etý toby qurylyp, táýlik boıy kezekshilik uıymdastyrylǵan.
Budan buryn Túrkistanda nóserden keıin sý jınalǵan aýmaqtardy tazartý qalaı júrip jatqanyn jazǵan edik.