Túrkistan oblysynda sý qoımasyn rekonstrýktsııalaý jumystary jaqynda aıaqtalmaq
TÚRKІSTAN. KAZINFORM — Túrkistan oblysynda 11 myńǵa jýyq turǵyndy aýyzsýmen qamtamasyz etetin sý qoımasyn rekonstrýktsııalaý jumystary aıaqtalýǵa jaqyn. Bul týraly Sý resýrstary jáne ırrıgatsııa mınıstrligi málim etti.
Túrkistan oblysynyń Báıdibek aýdanynda Qapshaǵaı sý qoımasyn rekonstrýktsııalaý jumystary júrip jatyr. Joba 2025 jyldyń sońyna deıin aıaqtalady dep josparlanyp otyr. Joba aıasynda qyzmettik ǵımarat jóndelip, eski temirbeton plıtalary alynyp tastalyp, bóget nyǵaıtylady. Sondaı-aq oıyqtar men qýystar toltyrylyp, shaıylǵan jerlerdi bekitý jáne beton tirekterin nyǵaıtý kózdelgen. Jumystar aıaqtalǵan soń 4,3 myń gektar egistik alqapqa sapaly sý jetkizý múmkindigi artady. Sondaı-aq jalpy sany 10 900 adam turatyn tórt eldi mekendi aýyz sýmen qamtýǵa múmkindik týady.
— 2023 jyly elimizdegi barlyq gıdrotehnıkalyq nysanǵa túgendeý júrgizilgennen keıin sý sharýashylyǵyn damytýǵa arnalǵan keshendi jospar jasaldy. Onda 160-tan astam is-shara qarastyrylǵan. Sonyń ishinde 42 jańa sý qoımasyn salý jáne jumys istep turǵan 37 sý qoımasyn rekonstrýktsııalaý jumystary bar. Oǵan qosa, mınıstrlik 1,3 mln adamdy aýyzsýmen qamtamasyz etý úshin 2,5 myń shaqyrymnan astam sý qubyryn salý jáne rekonstrýktsııalaý jumystaryn júrgizip jatyr. Jalpy alǵanda, 9 oblysta 31 joba júzege asyrylýda,— dedi Sý resýrstary jáne ırrıgatsııa vıtse-mınıstri Erbolat Ibraıhanov.
Aıta keteıik, bıyl ırrıgatsııa júıelerindegi sý shyǵyny 250 mln tekshe metrge deıin azaıdy.