Túrkistan oblysynda sý arnasynan aýdandyq mańyzy bar jolǵa qaýip tónip tur

TÚRKІSTAN. KAZINFORM — Saıram aýdany Qarasý aýyldyq okrýgine qarasty Áıteke bı aýylynda kópir mańyndaǵy sý arnasy aýdandyq mańyzy bar avtomobıl jolyna qaýip tóndirip tur. 

Aqsý sý arnasy sońǵy eki jyl boıy negizgi jolǵa qaraı yǵysyp, jaǵalaýdy shaıyp kelgen. Qazirgi kezde sý shaıǵan aýmaqtyń uzyndyǵy shamamen 20 metrge jetti.

Búgingi tańda sý arnasy men joldyń arasyn nebári úsh metr bólip tur. Bul jaǵdaı kóktem mezgilinde sý kólemi artqan jaǵdaıda joldyń opyrylýyna jáne sý tasqyny qaýpiniń kúsheıýine alyp kelýi múmkin.

Atalǵan máselege baılanysty Saıram aýdanynyń ákimi Madııar Orazalıev tıisti sala basshylarymen birge qaýipti aýmaqqa baryp, jaǵdaımen tanysty.

— Sý arnasynyń baǵytyn ózgertýdi josparlap otyrmyz. Eger sý tasysa, joldy tolyqtaı qoparyp ketý qaýpi bar. Sondyqtan bul máselege qazirden bastap kirisemiz. Kóktemde sý kólemi kúrt artatynyn eskere otyryp, arnaıy tehnıkalardy jumyldyryp, sý arnasyn retke keltirý jáne qalpyna keltirý jumystaryn jedel júrgizý jóninde jaýapty mekemelerge naqty tapsyrmalar berildi, — dedi aýdan ákimi.

Budan buryn Túrkistan oblysynda kóktemgi sý tasqynyna daıyndyq qalaı júrip jatqanyn jazǵan edik.