Túrkistan oblysynda sor shaıý úshin 400 mln tekshe metr sý berildi
ASTANA. KAZINFORM — Sýarmaly jerlerdiń melıoratıvtik jaǵdaıyn jaqsartý maqsatynda «Qazsýshar» RMK Túrkistan fılıaly Jetisaı jáne Maqtaaral aýdandarynda sor shaıý jumystaryn júrgizdi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Jalpy alǵanda fılıal Jetisaı aýdanyndaǵy 53,6 myń gektar jáne Maqtaaral aýdanyndaǵy 41 myń gektar alqapta sor shaıý úshin 400 mln tekshe metr sý jiberdi. Sonymen qatar, Shardara aýdanynda 8,1 myń gektar alqapta topyraqty ylǵaldandyrý jumystary júrgizilip jatyr. Qazir bul maqsatqa 262 mln tekshe metr sý berilgen. Óńir dıqandary sýdyń ýaqytyly jetkizilgeni úshin «Qazsýshar» RMK mamandaryna alǵys bildirip jatyr.
— Jeti gektar jerde maqta ósirip otyrmyz. Qazir egiske daıyndyq úshin alqaptardy ylǵaldandyryp jatyrmyz. Sý ýaqytynda ári jetkilikti kólemde kelip tur. «Qazsýshar» qyzmetkerlerine alǵys aıtamyn. Turaqty sý jetkizýdiń arqasynda bıyl mol ónim alamyz dep úmittenemiz,— dedi sharýa Aqjan Súleımenbekov.
«Qazsýshar» RMK Túrkistan fılıaly Jetisaı óndiristik bólimshesiniń basshysy Nurtas Tursynbekovtyń sózinshe, sor shaıý jumystary byltyr jeltoqsan aıynda bastaldy.
— Búginde bul jumystar tolyq aıaqtaldy. Qazir sýarmaly alqaptarǵa kókónis pen baqsha daqyldaryn sýarý úshin sý berip jatyrmyz. Sor shaıý jumystary maqta daqylyn ósirý úshin asa mańyzdy. Joǵary ónim alý úshin topyraqtaǵy tuz mólsherin tómendetý qajet. Al ylǵaldandyrý jumystary egis aldyndaǵy daıyndyq kezeńinde júrgiziledi, — dedi ol.
Osydan buryn Túrkistanda eko-aktsııa aıasynda 2 myńnan asa aǵash egilgenin jazdyq.
