Túrkistan oblysynda sońǵy eki aıda gazdan ýlanyp 6 adam qaza tapty

TÚRKІSTAN. KAZINFORM – Túrkistan oblysynda jyl basynan beri 37 órt oqıǵasy tirkeldi. Memlekettik órt baqylaý salasynda 51 708 nysan esepke alynǵan.

Oblystyq TJD Memlekettik órt baqylaý basqarmasy bastyǵynyń mindetin ýaqytsha atqarýshy Saýran Dosanulynyń aıtýynsha, órt saldarynan qaza tapqandar men jaraqattanǵandar joq. Al materıaldyq shyǵyn kólemi 160 mln 760 myń teńge bolǵan.

– Oblysta tirkelgen órt oqıǵalarynyń basym bóligi turǵyn úıler men avtokólikte bolǵan. Jyl basynan beri gazdan ýlanýdyń 3 deregi tirkelip, saldarynan 6 adam qaza taýyp, 1 adam jaraqat aldy. Memlekettik órt baqylaý salasynda 51 708 nysan esepke alynǵan. Bıyl osy nysandarda 31 tekserý júrgizildi. Nátıjesinde 105 tulǵaǵa qatysty ákimshilik is qaralyp, onyń 91-ine eskertý berildi, 32 tulǵaǵa aıyppul salyndy. Oblys aýmaǵynda áleýmettik osal toptarǵa jatatyn azamattardyń 34 197 turǵyn úı tirkelgen. Onyń ishinde 6 288 úıge tabıǵı gazdyń aqaýyn anyqtaıtyn qurylǵy, 2 057 úıge tútindik órt habarlaǵyshtary ornatylǵan, – dedi spıker baspasóz máslıhatynda.

Sonymen qatar departamenttiń Tótenshe jaǵdaılardyń aldyn alý basqarmasynyń aǵa ınjeneri Tamerlan Nurlanov óńirde sý tasqynynyń aldyn alý baǵytynda atqarylyp jatqan jumystar týraly baıandady.

– Oblys aýmaǵyndaǵy sý qoımalarynyń tolý deńgeıi orta eseppen 71 paıyzǵa jetti. Ózenderdegi sý deńgeıi qalypty mejeden tómen. Sý tasqyny kezeńinde tótenshe jaǵdaılardyń aldyn alý úshin 1 064 jeke quram, 124 tehnıka, 11 júzý quraly, 92 sý sorǵysh jáne 44 evakýatsııalyq tehnıka daıyndyqqa keltirildi. Sondaı-aq 45 myń qap pen 5 920 tonna ınertti materıal ázirlendi. Tótenshe jaǵdaı qaýpi týyndaǵan jaǵdaıda ystyq tamaq pen turmystyq qajettilikterdi qamtamasyz etý úshin kásipkerlermen 109 memorandým jasalyp, 432 tonna janar-jaǵarmaı qory daıyndaldy, – dedi T.Nurlanov.

Eske sala ketsek, budan buryn Túrkistan oblysynda ózen tasyp, 29 adam evakýatsııalanǵanyn jazǵan edik.