Túrkistan oblysynda Syrdarııa ózeninde sýǵa ketken ekinshi azamattyń denesi shyǵaryldy
TÚRKІSTAN. KAZINFORM – Túrkistan oblysy Saýran aýdanynda Syrdarııa ózenine sýǵa ketken eki azamattyń da denesi tabyldy.
Qaıǵyly jaǵdaı 22 tamyzda Úshqaıyq aýyldyq okrýgi aýmaǵynda bolǵan. Aldyn ala málimet boıynsha, 1998 jáne 2002 jyly týǵan eki aǵaıyndy sýǵa túsýge tyıym salynǵan jerde shomylǵan. Shomylý kezinde 24 jastaǵy azamat sýǵa batyp, inisin qutqarýǵa umtylǵan 28 jastaǵy aǵasy da sýǵa ketken.
Oqıǵa týraly habar túskennen keıin Túrkistan oblysy Tótenshe jaǵdaılar departamentiniń qutqarýshylary izdestirý jumystaryn bastady. Oǵan Shymkent qalasy TJ departamentiniń qyzmetkerleri, polıtsııa, jedel járdem mamandary, jergilikti turǵyndar men marqumdardyń týystary qatysty. Іzdeý jumystaryna 90-ǵa jýyq adam, arnaıy tehnıka, júzý quraldary men dron jumyldyryldy.
Oblystyq TJD málimetinshe, 24 tamyzda shomylǵan jerden shamamen 6 shaqyrym qashyqtyqtan 2002 jyly týǵan azamattyń denesi tabylyp, sýdan shyǵaryldy.
– Al 25 tamyzda izdestirý jumystary barysynda oqıǵa ornynan shamamen 30 shaqyrym jerden 1998 jyly týǵan ekinshi azamattyń denesi sý betinen tabyldy. Osylaısha, Syrdarııa ózenindegi izdestirý jumystary aıaqtaldy. Eki azamat ta qaza tapty, – delingen resmı habarlamada.
Tótenshe jaǵdaılar departamenti azamattardy sýǵa túsýge tyıym salynǵan oryndarda shomylmaýǵa jáne sýdaǵy qaýipsizdik talaptaryn qatań saqtaýǵa shaqyrady.
Buǵan deıin Túrkistan oblysyndaǵy Syrdarııa ózenine batyp ketken eki azamattyń biriniń denesi tabylǵanyn habarlaǵan edik.
