Túrkistan oblysynda Syrdarııa ózenin dárileý jumystary bastaldy

TÚRKІSTAN. KAZINFORM - Shirkeıge qarsy dezınsektsııa jumystary barysynda oblys aýmaǵyndaǵy 352 shaqyrymdy quraıtyn Syrdarııa ózeni 6 aımaqqa bólinip dárilenbek.

Shirkeılerdiń dernásilderimen kúresý úshin dárilerdi sýǵa jiberý ádisi, al sý qorǵaý jáne dalalyq aımaqtarda hımııalyq óńdeý ádisi qoldanylady. Sondaı-aq, dezınsektsııa jumystarynyń óńdeý alańy, dáriniń kólemi - ǵylymı súıemeldeýdiń qorytyndysyna sáıkes júrgiziledi. Mamandardyń sózine súıensek, dárilik zattyń tórt túlik malǵa, balyq pen ózge tirshilik ıelerine esh qaýipi joq. 

«Bıyl 8 aqpannan bastap ǵylymı súıemeldeý jumystary júrgizilgen bolatyn. Atalǵan baǵyttaǵy jumystarǵa 42 tehnıka men 96 jumysshy kúshi jumyldyryldy. Qazirgi tańda oblysta shirkeılerge qarsy dárileý jumystaryn merdiger «Satti Tulik» JShS-i júrgizýde. Dezınsektsııa jumystaryna áýe ushaǵy, arnaıy kólikter men mamandar tartylǵan», - delingen Túrkistan óńirlik kommýnıkatsııa qyzmeti taratqan aqparatta.

Aıta keteıik, bıyl Túrkistan oblysynda shirkeımen kúres erte bastaldy. Ótken jyly sáýir aıynda qolǵa alynǵan dezınsektsııa jumystary bıyl naýryzdan bastap júrgizile bastady. 

Al, ǵalym Qarshyǵa Kóshkımbaev «Kóksaraı» sý rettegishi turǵan kezde shirkeıden qutyla almaımyz» - degen pikir aıtty.