Túrkistan oblysynda synyptasyn óltirgen 4 oqýshyǵa úkim shyqty
TÚRKІSTAN. KAZINFORM — Túrkistan oblysynda synyptasyn soqqyǵa jyǵyp, onyń ólimine sebep boldy dep aıyptalǵan tórt jasóspirimge qatysty sot úkimi jarııalandy. Negizgi aıyptalýshy 7 jyl 6 aıǵa bas bostandyǵynan aıyryldy. Al qalǵan úsh jasóspirimge bas bostandyǵyn shekteý jazasy taǵaıyndaldy.
Túrkistan oblysynyń kámeletke tolmaǵandardyń isteri jónindegi mamandandyrylǵan aýdanaralyq soty synyptasyn zırat basyna aparyp, uryp-soǵyp óltirdi dep aıyptalǵan tórt oqýshyǵa qatysty úkim shyǵardy.
Olardyń úsheýi Qylmystyq kodekstiń «Buzaqylyq» baby boıynsha kináli dep tanyldy. Al negizgi aıyptalýshyǵa bul bappen qatar «Densaýlyqqa qasaqana aýyr zııan keltirý» baby boıynsha aıyp taǵyldy.
Adam ólimine ákelgen qaıǵyly oqıǵa ótken jyldyń qarasha aıynda Túrkistan qalasynda bolǵan.
Oblystyq sottyń málimetinshe, jasóspirimder ózderimen birge oqıtyn 9-synyp oqýshylaryn bolmashy sebeppen zırat mańyna jınap, sapqa turǵyzǵan. Keıin árqaısysy olardyń keýde tusyna bir retten judyryqpen soqqy jasaǵan. Munymen toqtamaǵan negizgi aıyptalýshy jábirlenýshilerdiń birin taǵy da judyryqpen urǵan. Saldarynan jasóspirim oqıǵa ornynda kóz jumǵan.
Prokýror sottan negizgi aıyptalýshyny 7 jyl 6 aı merzimge, qalǵan úsheýin 1 jyl 4 aı merzimge bas bostandyǵynan aıyrýdy suraǵan.
Sottalýshylar kinálaryn tolyq moıyndap, shyn nıetpen ókinish bildirip, isti toqtatýdy nemese bas bostandyǵynan aıyrmaıtyn jeńil jaza taǵaıyndaýdy surady. Sondaı-aq kámeletke tolmaǵan 21 jábirlenýshi men olardyń zańdy ókilderi sottalýshylardy keshiretinderin aıtyp, qylmystyq isti toqtatýdy ótingen.
— Kámelet jasqa tolmaǵan sottalýshy M. 7 jyl 6 aı merzimge bas bostandyǵynan aıyryldy. Sondaı-aq kámelet jasqa tolmaǵan sottalýshylar M., B., T.-ǵa 1 jyl 4 aı merzimge bas bostandyǵyn shekteý jazasy taǵaıyndaldy, — delingen oblystyq sottyń habarlamasynda.
Qaza bolǵan jasóspirimniń aǵasy bir sottalýshyny keshirgen. Al úsheýinen 30 mln teńge moraldyq zııan óndirýdi talap etken. Alaıda sot úkimimen olardyń zańdy ókilderiniń árqaısysynan 200 myń teńgeden moraldyq shyǵyn óndirildi.
Úkim zańdy kúshine engen joq.
Budan buryn habarlaǵanymyzdaı, Atyraýda qatarlasyn pyshaqtaǵan oqýshynyń isi sotqa jetti.
