Túrkistan oblysynda shomylý oryndary kóbeıedi: qaýipsizdik qalaı saqtalady
TÚRKІSTAN. KAZINFORM – Sýdaǵy jantúrshigerlik statıstıka áli de alańdatady. Ótken jyly Túrkistan oblysynda sýdaǵy qaıǵyly oqıǵalardan 55 adam kóz jumdy, onyń jartysyna jýyǵy – bala.
Túrkistan oblysy TJD tótenshe jaǵdaılardy joıý basqarmasynyń basshysy Dáýren Júsipovtiń aıtýynsha, ótken jyly óńirde 43 shomylatyn arnaıy oryn jumys istese, bıyl olardyń sanyn 53-ke deıin kóbeıtý josparlanyp otyr.
– Sonymen qatar kommýnaldyq jaǵajaılar sany da artady. Bul azamattardyń qaýipsizdigin qamtamasyz etýge múmkindik beredi. Jaǵajaılarda qutqarý beketteri, medıtsınalyq pýnktter jáne qoǵamdyq qaýipsizdik oryndary uıymdastyrylady. Al shomylý oryndary jetkiliksiz eldimekenderde 376 karkasty-modýldi basseın ornatý kózdelgen, – dedi ol.
Spıkerdiń sózinshe, ótken jyly óńirde túrli jaǵdaıda sýda bolǵan oqıǵalarǵa qatysty 55 adam qaza tapqan, onyń 25-i – bala.
– Al shomylý maýsymy kezinde 27 adam kóz jumǵan, onyń 13-i – eresekterdiń qaraýynsyz qalǵan bala, – dedi Dáýren Júsipov.
Taldaý kórsetkendeı, qaıǵyly jaǵdaılardyń negizgi sebebi – balalardyń qaraýsyz qalýy, qaýipsizdik erejelerin saqtamaý, sondaı-aq mas kúıde sýǵa túsý. Sonymen qatar kanaldar men aryqtarǵa abaısyzda qulaý jaǵdaılary jıilegen. Byltyrǵy derekke súıensek, qaıǵyly oqıǵalardyń 82%-y dál osy kanaldar men aryqtarda bolǵan.
Qazirgi tańda oblys aýmaǵynda uzyndyǵy 15 myń shaqyrymnan asatyn 3 myńnan astam sýarý kanaldary men aryqtar bar. Olardyń 800-den astamy, ıaǵnı 5400 shaqyrymy eldimekenderge jaqyn nemese sol aýmaqtar arqyly ótedi.
– Bıyl balalardyń qaýipsizdigin qamtamasyz etý maqsatynda kanaldar boıyna 135 shaqyrym qorshaý ornatý, 1750 tyıym salý belgisin qoıý jáne 101 beınebaqylaý kamerasyn ornatý josparlanǵan, – dedi spıker.
Sonymen qatar balalardy júzýge úıretý úshin kommýnaldyq jáne jeke basseındermen memorandým jasalyp, áleýmettik osal toptaǵy balalarǵa aptasyna eki ret tegin shomylý múmkindigi beriledi.
Aıta keteıik, bıylǵy reıd barysynda sýdaǵy qaýipsizdik erejelerin buzǵan kámeletke tolmaǵan balalardyń ata-analaryna 7 ákimshilik aıyppul salynǵan, jalpy 105 962 teńge boldy. Al ótken jyly shomylý maýsymynda 151 jeke tulǵaǵa 2 078 062 teńge, sondaı-aq 3 zańdy tulǵa men 3 kásipkerge 235 920 teńge kóleminde ákimshilik jaza qoldanylǵan.
Budan buryn habarlaǵanymyzdaı, bıyl naýryz-sáýir aılarynda óńirde balalardyń qaraýsyz qalýynan 8 sýdaǵy jazataıym oqıǵa tirkelgenin jazǵan edik.
