Túrkistan oblysynda shomylý maýsymy bastalǵaly 17 adam sýǵa ketip kóz jumdy
TÚRKІSTAN. KAZINFORM — Oblys aýmaǵynda shomylýǵa tyıym salynǵan 100-den astam qaýipti oryn anyqtalǵan.
Jyl basynan beri Túrkistan oblysynda sýdaǵy qaıǵyly oqıǵalardan 43 adam kóz jumdy, onyń 26-sy — bala.
Al bıylǵy shomylý maýsymynda 17 adam qaza tapty. Onyń 10-y — bala bolsa, 7-eýi — eresek adam. Qaıǵyly oqıǵalar kól, ózen, sý qoımalary, kanaldar men karerlerde tirkelgen.
Oblystyq TJD Tótenshe jaǵdaılardy joıý basqarmasynyń ınjeneri, azamattyq qorǵaý podpolkovnıgi Fýrhat Joldasovtyń aıtýynsha, jazataıym oqıǵalardyń deni balalardyń qaraýsyz qalýy jáne turǵyndardyń shomylýǵa tyıym salynǵan oryndarda sýǵa túsýi saldarynan bolǵan.
— Oblys aýmaǵynda shomylýǵa tyıym salynǵan 111 qaýipti oryn anyqtaldy. Qazirgi tańda talapqa saı jabdyqtalǵan 18 jaǵajaı jumys istep tur, taǵy 13 orynda qaýipsizdik talaptaryna sáıkestendirý jumystary júrgizilip jatyr, — dedi Fýrhat Joldasov.
Spıkerdiń málimetinshe, oblystaǵy 144 júzý basseıniniń tek 51-i ǵana qaýipsizdik talaptaryna tolyq sáıkes keledi.
Keıingi úsh jyldaǵy taldaý nátıjesi boıynsha sýdaǵy qaıǵyly oqıǵalardyń 95 paıyzdan astamy arnaıy belgilenbegen ári shomylýǵa tyıym salynǵan oryndarda bolǵan.
— Jyl basynan beri reıdtik is-sharalar barysynda qaýipsizdik talaptaryn buzǵan 152 azamat ákimshilik jaýapkershilikke tartylyp, olarǵa jalpy 2,3 mln teńgeden astam aıyppul salyndy. Sondaı-aq qaýipti ýchaskelerde 683 eskertý taqtaıshasy men 113 aqparattyq stend ornatylyp, 400-den astam tyıym salý belgisi qoıyldy, — dedi Fýrhat Joldasov.
Departament ókilderi turǵyndardy tek arnaıy jabdyqtalǵan jaǵajaılarda shomylýǵa, balalardy sý aıdyndaryna qaraýsyz jibermeýge jáne qarapaıym qaýipsizdik erejelerin qatań saqtaýǵa shaqyrdy.
Eske sala keteıik, ótken jyly Túrkistan oblysynda sýdaǵy qaıǵyly oqıǵadan 55 adam kóz jumdy, onyń 25-i — bala.
