Túrkistan oblysynda shetel azamaty 13 jylǵa bas bostandyǵynan aıyryldy

TÚRKІSTAN. KAZINFORM - Tekserý barysynda onyń sómkesi men kóliginen gashısh, keptirilgen marıhýana, mefedron tabyldy.

Túrkistan oblysynyń qylmystyq ister jónindegi mamandandyrylǵan aýdanaralyq sotynda shetel azamatyna qatysty qylmystyq is qaraldy. Ol Qazaqstan Respýblıkasy Qylmystyq kodeksiniń 296-babynyń 4-bóligi, 24-babynyń 3-bóligi jáne 286-babynyń 4-bóligi boıynsha aıyptalǵan.

Aıyptalýshy asa iri kólemde esirtki jáne psıhotroptyq zattardy zańsyz saqtap, óziniń avtokóligimen tasymaldaǵan. Ol Saryaǵash aýdanyndaǵy «Jibek joly» memlekettik shekara beketi arqyly ótý kezinde ustaldy. Qyzmettik izdestirý ıtteri kúdiktiniń qol júginen tyıym salynǵan zattardy taýyp berdi.

Tekserý barysynda onyń sómkesinen 0,0642 gr gashısh, 0,1156 gr jáne 0,0810 gr keptirilgen marıhýana tabyldy. Al avtokóligin tintý kezinde jasyrylǵan kúıde 56,22 gr mefedron, 3,23 gr gashısh jáne 1,40 gr keptirilgen marıhýana anyqtaldy.

Sot onyń ókinýin jáne jas balalary bar ekenin jazany jeńildetetin mán-jaı retinde eskerdi. Aýyrlatatyn jaǵdaılar anyqtalǵan joq.

Sot úkimimen ol 3 jylǵa bas bostandyǵynan aıyryldy. Sonymen qatar onyń «Chevrolet Cobalt» markaly avtokóligi memleket paıdasyna tárkilendi.

Úkim zańdy kúshine engen joq.

Aıta keteıik, budan buryn Túrkistan oblysynda 3,7 mlrd teńgeni jymqyrǵan bilim salasynyń qyzmetkerleri sottalǵanyn jazǵan bolatynbyz.