Túrkistan oblysynda shegirtkemen kúreske daıyndyq qalaı júrip jatyr
TÚRKІSTAN. KAZINFORM — Túrkistan oblysynda jyl saıyn shegirtkeden qaýip bar. Ásirese yrys-nesibesin qara jerden taýyp otyrǵan dıqandar úshin bul másele ózekti.
Ótken jyly shegirtke zııankesi óńirdiń toǵyz aýdanynda tirkelip, ásirese Arys qalasy men Saryaǵash, Keles aýdandarynda kóp baıqalǵan.
Oblystyq aýyl sharýashylyǵy basqarmasynyń málimetinshe, bıyl oblysta asa qaýipti marokko shegirtkesine qarsy hımııalyq óńdeý jumystary 408 myń gektar aýmaqta júrgiziledi.
— Onyń ishinde 328 myń gektar jer ústi búrikkishterimen, 72,3 myń gektar ushaqpen («AN-2»), 5,6 myń gektar aspaly búrikkishtermen jáne 2,1 myń gektar alqap drondar arqyly óńdeledi. Al saıaq shegirtkege qarsy 36 myń gektar alqapqa hımııalyq óńdeý júrgiziledi, — delingen basqarma aqparatynda.
Vedomstvo málimetinshe, marokko shegirtkesiniń kúbirshelerin 52,9 myń gektar aýmaqta zertteý josparlanǵan. Naýryz aıynyń basynan beri «Boljam ortalyǵy» kúbirshelerge kóktemgi zertteý jumystaryn júrgizgen.
Qazirgi tańda Arys qalasy, Saryaǵash jáne Keles aýdandaryndaǵy oshaqty aımaqtar tekserildi. Keı aýmaqtarda 1 sharshy metrdegi kúbirshe tyǵyzdyǵy 120 danaǵa deıin jetse, keı jerlerde 1 dana deńgeıinde tirkelgen.
— Arys, Keles, Saryaǵash aýmaqtarynda kúbirshe tyǵyzdyǵy byltyrǵydan az bolýy múmkin dep boljanyp otyr. Alaıda ornalasý aımaǵynyń ulǵaıý qaýpi bar. Óńirde fıtosanıtarııalyq jaǵdaıǵa taldaý jasalyp, 65 sektor belgilendi. Óńdeý jumystary aýa raıyna baılanysty sáýir aıynyń ekinshi onkúndiginde bastalady, — dep málimdedi aýyl sharýashylyǵy basqarmasy.
Mamandardyń aıtýynsha, bir shegirtke shamamen 100-ge jýyq jumyrtqa salady, sondyqtan der kezinde tolyq joıylmaǵan jaǵdaıda zııankes tez kóbeıedi. Ótken jyly tájirıbe retinde óńirde 1000 gektardan astam oshaqty alqaptarda jer jyrtý ádisi qoldanylǵan. Nátıjesinde kúbirshelerdiń zaqymdanýy 10-15 paıyzdy kórsetken.
Shegirtkemen kúreste anyqtaýshy toptarǵa jatyn oryndar daıyndalyp, shtabtar Keles pen Arysta ornalasady.
Sondaı-aq zııankestiń taralýyn boldyrmaý úshin Sozaq, Báıdibek aýdandary men Ózbekstanmen shekaralas aýmaqtar turaqty baqylaýǵa alynady.
Budan buryn habarlaǵanymyzdaı, ótken jyly Ońtústikte shegirtke qaptaǵan edi.
