Túrkistan oblysynda shegirtke men shirkeıge qarsy óńirlik jospar ázirlene me — Bektenov jaýaby
ASTANA. KAZINFORM — Premer-Mınıstr Oljas Bektenov Májilis depýtattarynyń Túrkistan oblysynda shegirtke me shirkeılermen kúrestiń óńirlik josparyn ázirleý usynysyna jaýap berdi.
— Kókqasqa shegirtkege qarsy is-sharalar júrgizýge kelsek, bıyl elimizde kókqasqa shegirtke tektes zııankesterge qarsy hımııalyq óńdeý kólemi 2,1 mln gektardy quraıdy. Bul maqsatqa respýblıkalyq bıýdjetten 7,1 mlrd teńge bólindi, 440 birlikten astam búrký tehnıkasy jumyldyryldy. Túrkistan oblysynda is-sharalar aıaqtaldy, 371,8 myń gektar óńdeldi. Bul josparlanǵan kólemniń 193,6 paıyzyn quraıdy. Bekitilgen josparǵa sáıkes barlyq ákimdikter dezınsektsııalyq jumystardy, sonyń ishinde avıatsııalyq jáne jerústi óńdeýdi ranetstik búrikkishterdi qoldana otyryp júrgizedi. Barlyq qajetti hımııalyq jáne bıologııalyq preparattar qoljetimdi, sondyqtan shirkeılermen kúresýdiń bólek óńirlik josparyn jasaý qajet emes, — dedi Úkimet basshysy jaýabynda.
Onyń atap ótýinshe, «Ósimdikterdi qorǵaý týraly» Zańǵa sáıkes, úıirli jáne saıaq shegirtke tektes zııankesterden qorǵaý boıynsha barlyq is-sharalar bıýdjetten qarjylandyrylady. Bul rette aýyl sharýashylyǵy taýaryn óndirýshilerge asa qaýipti zııankestermen kúresý úshin paıdalanylatyn pestıtsıdter qunynyń 50 paıyzyna deıin sýbsıdııalar beriledi.
— Fıtosanıtarııalyq is-sharalardyń tıimdiligin arttyrý maqsatynda «Qazaqstan Respýblıkasynyń keıbir zańnamalyq aktilerine fıtosanıtarııalyq qaýipsizdik máseleleri boıynsha ózgerister men tolyqtyrýlar engizý týraly» Zań jobasy ázirlendi. Shegirtkege qarsy monıtorıng jáne oǵan qarsy kúres jónindegi fýnktsııalar men bıýdjetterdi respýblıkalyq deńgeıden jergilikti deńgeıge berý kózdeledi, — dedi Oljas Bektenov.
Aıta keteıik, Májilis depýtattary zııankestermen kúres boıynsha keshendi óńirlik baǵdarlama ázirleýdi, Túrkistan oblysynyń tabıǵı-klımattyq erekshelikterin eskere otyryp, shegirtke men shirkeıge qarsy kúreske arnalǵan arnaıy óńirlik jospar qabyldaýdy usynǵan edi.