Túrkistan oblysynda sharýalarǵa arnalǵan oqý ortalyǵy qurylady
ASTANA. KAZINFORM – Sý resýrstary jáne ırrıgatsııa mınıstrligi men BUU Damý baǵdarlamasy birlesken jobalardyń iske asyrylý barysyn talqylady.
Sý resýrstary jáne ırrıgatsııa mınıstri Nurjan Nurjigitov Qazaqstandaǵy BUU Damý baǵdarlamasynyń Turaqty ókili Katarjına Vavernııamen kezdesti.
Taraptar birlesken jobalardyń júzege asyrylý barysyn talqylady. Atqarylyp jatqan jumystar jóninde Tsıfrlandyrý departamentiniń dırektory Erdáýlet Jumat, Jerasty sýy departamentiniń dırektory Jaıyq Erikuly, Sý sharýashylyǵy ımarattaryn damytý departamentiniń dırektory Saǵı Útelov jáne Ǵylym jáne ınnovatsııa departamentiniń dırektory Marat Imanalıev baıandady.
Japonııa Úkimetiniń granttyq qarajaty esebinen Qazaqstandaǵy bógetterdi keshendi basqarý arqyly sý tasqynyna qarsy is-sharalardy jetildirýge baǵyttalǵan joba iske asyrylyp jatyr. Joba aıasynda bógetterde erte eskertý pılottyq júıesin engizý, derekterdi Sý resýrstarynyń ulttyq aqparattyq júıesine biriktirý jáne gıdrotehnıkalyq nysandardyń tsıfrlyq derekter bazasyn qalyptastyrý kózdelgen.
Qazirgi kezeńde erte eskertý júıesiniń qurylymy ázirlenip, tsıfrlyq derekter bazasy quryldy. Sondaı-aq pılottyq sý qoımalary boıynsha gıdrodınamıkalyq modelder daıyndalyp, sý basý aımaqtaryn stsenarıılik modeldeý júrgizildi. Sonymen qatar Almaty, Jambyl, Qyzylorda, Túrkistan men Jetisý oblystaryndaǵy sýarmaly alqaptar men kanaldardy tsıfrlandyrý jumystary júrgizilip jatyr.
Joba sý paıdalaný esebin jetildirýge jáne protsesterdi tsıfrlandyrýǵa baǵyttalǵan. Búgingi tańda osy óńirlerdegi aýyl sharýashylyǵy alqaptarynyń 100%-y jáne sýarý kanaldarynyń 50%-y tsıfrlandyrylyp, topyraq ylǵaldylyǵynyń kartalary ázirlendi.
Budan bólek, «Sý jetkizý qyzmetteri» modýli bar sý tutynýdy erte boljaý júıesi ázirlendi. Bul júıe arqyly sýarý sýyn jetkizýge ótinish berýge, sý lımıtterin bólýge jáne elektrondy tsıfrlyq qoltańba (ETsQ) arqyly sharttar jasaýǵa bolady.
«Klımat ózgerisine tózimdi sý resýrstaryn damytý» jobasynyń birinshi kezeńi aıasynda «Qazgıdrogeologııa» Ulttyq gıdrogeologııalyq qyzmetiniń óńirlik fılıaldaryn zamanaýı tehnıkamen, jabdyqtarmen jáne zertteý quraldarymen qamtamasyz etý jumystary júrgizilip jatyr. Olardyń qatarynda jerasty sýyn anyqtaıtyn detektor, jyljymaly zerthana, burǵylaý qondyrǵysy jáne basqa da qural-jabdyqtar bar.
Sonymen qatar Qazaq sý sharýashylyǵy ǵylymı-zertteý ınstıtýtyn jańa tehnıkamen jabdyqtaý jumystary júrgizilip jatyr. Jalpy sany 66 jabdyq satyp alý josparlanǵan.
BUU Damý baǵdarlamasy, mınıstrlik jáne Eýrazııalyq damý banki arasyndaǵy úshjaqty kelisim aıasynda Túrkistan oblysynda sharýalarǵa arnalǵan óńirlik oqý ortalyǵyn qurý jobasy iske asyrylyp jatyr. Onyń maqsaty – sý únemdeý tehnologııalaryn engizýdi yntalandyrý.
Qazirgi ýaqytta oqý ortalyǵyndaǵy oqytý men praktıkalyq sabaqtardyń formaty talqylanyp jatyr. Sonymen qatar BUU Damý baǵdarlamasy «Qazaqstandaǵy turaqty ırrıgatsııa salasyndaǵy kásipkerlik ekojúıesin damytý» baǵdarlamasy aıasynda Shyǵys Qazaqstan oblysyndaǵy Kendirlik ózeninde sý qoımasyn salýdyń tehnıkalyq-ekonomıkalyq negizdemesin ázirlep jatyr.
Kezdesý qorytyndysy boıynsha taraptar barlyq birlesken bastamany múmkindiginshe jedel ári sapaly iske asyrý tetikterin ázirleýge kelisti.
– BUU Damý baǵdarlamasynyń qoldaýymen Qazaqstannyń sý sharýashylyǵy salasyn damytýǵa, onyń ishinde granttyq qarajat túrinde qomaqty qarjy tartyldy. Búginde biz ázirlengen josparlardyń barlyǵyn kezeń-kezeńimen júzege asyryp kelemiz. Mınıstrlik árbir jobany turaqty baqylaýda ustap otyr. Búgingi kezdesý atqarylyp jatqan jumystardyń aralyq qorytyndylaryn shyǵarýǵa, pikir almasýǵa jáne árbir birlesken bastama boıynsha aldaǵy jumystyń baǵytyn aıqyndaýǵa múmkindik berdi, – dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin sý resýrstarynyń ulttyq aqparattyq júıesi ázirlengenin jazǵan edik.
