Túrkistan oblysynda sharýalardyń jer úlesine qatysty daý týyndady
TÚRKІSTAN. KAZINFORM — Saıram aýdanyndaǵy «Agrofırma Mártóbe» óndiristik kooperatıviniń birqatar múshesi quramnan shyǵarylyp, jer úlesterine qatysty shaǵymdandy.
Qarasý aýylynda ornalasqan kooperatıv 2000 jyly tirkelgen. Negizgi baǵyty — eginshilik. Jer kólemi — 1 myń gektar shamasynda.
Sharýalar 2025 jylǵy 12 qarashada kooperatıvtiń jalpy jınalysy zań talaptaryn buza otyryp ótkizilip, onyń saldarynan jalǵan hattama jasalǵanyn alǵa tartady. Sonyń negizinde kooperatıv tóraǵasy retinde Nasırýlla Sýleımanov tirkelgen. Atalǵan hattamaǵa sáıkes, kooperatıvten 147 múshe shyǵarylyp, ornyna 222 adam engizilgen. Shaǵymdanýshylardyń sózinshe, olardyń arasynda kooperatıv qyzmetine qatysy joq, tipti ózderiniń múshe retinde tirkelgeninen habarsyz azamattar da bolǵan.
Kooperatıvtiń burynǵy tóraǵasy Erǵalı Súgiralıevtiń talap aryzy boıynsha Túrkistan oblysynyń mamandandyrylǵan aýdanaralyq ekonomıkalyq soty 2026 jylǵy 3 sáýirde «Mártóbe Agrofırmasy» óndiristik kooperatıvi músheleriniń 2025 jylǵy 12 qarashadaǵy jalpy jınalysynyń hattamalyq sheshimin jaramsyz dep tanyǵan.
— Biz kúnniń ystyǵynda egin egip, ónim jınap, kooperatıv múshelerine paı úlesterin taratyp kelgen qarapaıym eńbek adamymyz. Kooperatıvtiń múlkine qatysty zańsyz áreketter jasalyp, jer úlesterimizden aıyrylyp qalý qaýpi týyndap otyr. Endi ondaǵan jyl eńbek etken adamdardyń quqyǵy taptalmaýy kerek, — dedi Erǵalı Súgiralıev.
Saıram aýdany ákimdiginiń málimetinshe, 2026 jylǵy 3 shildede Nasırýlla Súleımanovqa qatysty sotqa deıingi tergep-tekserý bastalǵan.
Ákimdik kooperatıvtiń ishki qyzmetine qatysty óz quzyreti shekteýli ekenin atap ótti. Sonymen qatar kooperatıvke tıesili Aqsýkent aýyldyq okrýgindegi 5,77 gektar jer ýchaskesiniń paıdalanylýyna qatysty tekserý júrgizilip jatqanyn habarlady.
Qoǵam belsendileri atalǵan aýmaqta mal qaldyqtaryn óńdeıtin tseh salynǵanyn jáne mal ólekselerin tastaıtyn shuńqyr qazylǵanyn áleýmettik jelide jarııalaǵan.
— Saıram aýdandyq jer qatynastary bólimi júrgizgen zerdeleý barysynda topyraqtyń qunarly qabatynyń buzylǵany, qurylys nysandarynyń salynǵany jáne jerdiń nysanaly maqsatyna sáıkes paıdalanylmaǵany anyqtaldy. Qazirgi ýaqytta jer ýchaskesine qatysty tekserý júrgizilip jatyr. Tekserý nátıjesi boıynsha zańnamaǵa sáıkes tıisti sharalar qabyldanady, — dep habarlady aýdan ákimdiginiń baspasóz qyzmeti.
Buǵan deıin Túrkistan oblysynda bıyl maqsatyna saı paıdalanylmaǵan 47,6 myń gektar jer ýchaskesi memleket menshigine qaıtarylǵanyn jazǵan edik.
