Túrkistan oblysynda sharýalardy sý únemdeýge úıretetin «Sý mamandary mektebi» qurylady
ASTANA. KAZINFORM - Sý resýrstary jáne ırrıgatsııa mınıstrliginiń «Qazsýshar» respýblıkalyq memlekettik kásiporny Túrkistan oblysynda sharýalarǵa arnalǵan óńirlik oqý ortalyǵy – «Sý mamandary mektebin» qurý jobasyn júzege asyryp jatyr, dep habarlaıdy mınıstrliktiń baspasóz qyzmeti.
Joba Eýrazııalyq damý bankiniń «Qazaqstanda turaqty sýarý júıesin damytýǵa arnalǵan bıznes-ekojúıeni damytý» granttyq baǵdarlamasy aıasynda júzege asyrylady.
Qazirgi ýaqytta Túrkistan qalasynda oqý bólmelerin daıyndaý jumystary júrgizilip jatyr. Oqytý barysynda sý resýrstaryn tıimdi paıdalanýǵa jáne sý únemdeý tehnologııalaryn sýarý júıelerine engizýdi yntalandyrýǵa baǵyttalǵan teorııalyq jáne praktıkalyq kýrstar ótkiziledi.
Halyqaralyq jáne ulttyq sarapshylardy tartý, Qazaqstannyń joǵary oqý oryndarymen yntymaqtastyq ornatý jáne Ortalyq Azııa elderimen tájirıbe almasý josparlanyp otyr.
-Bul joba zamanaýı sýarý júıelerine kóshý úshin jaǵdaı jasaýǵa baǵyttalǵan. Mınıstrlik jobany respýblıkalyq deńgeıde keńeıtpes buryn birneshe pılottyq alańdy iske qosý múmkindigin qarastyryp jatyr. Túrkistandaǵy óńirlik oqý ortalyǵy oblystyq deńgeıde is-sharalar uıymdastyryp, sý únemdeý salasyndaǵy tájirıbe, bilim men tehnologııalardy jınaqtaý ortalyǵyna aınalady, – dedi «Qazsýshar» RMK bas dırektory Ánýar Óskenbaev.
Aıta keteıik, Premer-mınıstr Oljas Bektenov Úkimet otyrystarynyń birinde zamanaýı sý únemdeý tehnologııalaryna kóshýge yntalandyrýdy jalǵastyrý qajettigin aıtqan bolatyn.
