Túrkistan oblysynda sharýalar sút kólemin 8 ese asyryp kórsetip, sýbsıdııa alǵan
ASTANA. KAZINFORM – Túrkistan oblysynda aýyl sharýashylyǵy salasyna bólingen 1 mlrd teńgege jýyq bıýdjet qarajatyn jymqyrý derekteri anyqtaldy. Prokýratýra tekserisi barysynda sharýa qojalyqtarynyń óndirilgen sút kólemin jalǵan qujattar arqyly birneshe ese asyryp kórsetkeni belgili boldy.
Túrkistan oblysy prokýratýrasynyń málimetinshe, oblystyq aýyl sharýashylyǵy basqarmasynda júrgizilgen tekserý júıeli zań buzýshylyqtardy anyqtaǵan.
Atap aıtqanda, Saıram aýdanyndaǵy sharýa qojalyqtary jalǵan málimetter men qujattardy paıdalanyp, óndirilgen sút kólemin naqty kórsetkishten 8 ese artyq kórsetken. Osylaısha bıýdjetten zańsyz sýbsıdııa alý derekteri tirkeldi.
– Tekserý nátıjesi boıynsha sýbsıdııalardy jymqyrýdyń 2 faktisi Sotqa deıingi tergep-tekserýlerdiń biryńǵaı tizilimine tirkelip, asa iri mólsherdegi alaıaqtyq boıynsha sotqa deıingi tergep-tekserý oblystyń arnaıy prokýrorlaryna tapsyryldy, – dep habarlady qadaǵalaý organy.
Qazirgi ýaqytta tórt kúdiktige qatysty bir qylmystyq is boıynsha tergeý aıaqtaldy. Bıýdjetke 40 mln teńge qaıtarylyp, kúdiktilerdiń quny 100 mln teńgeden asatyn múlkine tyıym salyndy.
Ekinshi qylmystyq is boıynsha sotqa deıingi tergep-tekserý jalǵasyp jatyr.
Aıta keteıik, buǵan deıin Túrkistan oblysynda 103 mln teńge sýbsıdııany jymqyrýǵa qatysty qylmystyq is sotqa joldanǵan bolatyn. Tergeý málimetinshe, kúdiktiler aýyl sharýashylyǵy janýarlary týraly jalǵan derekter engizý arqyly bıýdjet qarajatyn zańsyz alǵan.
