Túrkistan oblysynda sharýalar maqta jınaýǵa kiristi
ASTANA. KAZINFORM- Qazaqstanda vegetatsııa kezeńi turaqty ótip jatyr. «Qazsýshar» RMK-men kelisimshart jasasqan barlyq sharýa qojalyqtary sýarmaly sýmen ýaqytyly qamtamasyz etildi. Túrkistan oblysynyń Jetisaı jáne Maqtaaral aýdandaryndaǵy dıqandar maqta jınaýǵa kiristi.
Bul týraly QR Sý resýrstary jáne ırrıgatsııa mınıstrliginiń baspasóz qyzmeti habarlady.
Sharýalar sýdy bekitilgen kestege sáıkes ári tolyq kólemde jetkizip bergeni úshin «Qazsýshar» RMK-nyń jergilikti fılıalyna alǵys bildirdi.
-Bıyl 10 gektar jerge maqta ektik. Ótken jylmen salystyrǵanda sý jaǵdaıy áldeqaıda jaqsardy. Sý kestege saı, jetkilikti kólemde kelip jatyr. Eshqandaı másele bolǵan joq. Buryn shalǵaıdaǵy jerlerdi sýmen qamtamasyz etýde qıyndyqtar týyndaıtyn, qazir bul másele sheshimin tapty. «Qazsýsharǵa» úlken raqmet, – dedi «Arynbek ata» sharýa qojalyǵynyń tóraǵasy Nurmahambet Arynbek.
-4,5 gektar jerge maqta ósiremiz. Egistikti eki ret sýardyq. Sýdy kestege saı aldyq. Kanaldardyń betonmen qaptalýynyń arqasynda sý ysyraby azaıdy. Endi sý shalǵaıdaǵy ýchaskelerge de ýaqytyly jetedi, – dedi sharýa Ismaıl Atıllov.
«Qazsýshar» RMK Túrkistan fılıaly jergilikti sharýa qojalyqtarymen 277,5 myń gektar aýyl sharýashylyǵy alqabyn sýarýǵa sý berý boıynsha 12 409 kelisimshart jasasty. Onyń ishinde 3 500 gektarǵa kúrish, 104,8 myń gektarǵa maqta egilgen.
Túrkistan oblysy boıynsha 2026 jylǵy vegetatsııa kezeńine arnalǵan sý alý lımıti 3,3 mlrd tekshe metr. Búgingi tańda 3,2 mlrd tekshe metr sý alynyp, 270,8 myń gektar egis alqaby sýaryldy.
Jetisaı aýdany boıynsha sý alý lımıti 663 mln tekshe metrdi quraıdy. Búgingi tańda onyń 585 mln tekshe metri paıdalanyldy.
Bıylǵy vegetatsııa kezeńinde aýdan dıqandary 53,6 myń gektar jerge maqta ekti. Jergilikti fermerlermen sýarmaly sý berý boıynsha 2 567 kelisimshart jasaldy.
Osyǵan deıin Túrkistanda maqta agroónerkásiptik kesheni iske qosylǵany týraly jazdyq.
