Túrkistan oblysynda seriktestik tutynýshylardan 54 mln teńgeden astam qarajatty zańsyz alǵan
TÚRKІSTAN. KAZINFORM – Ulttyq ekonomıka mınıstrligi Tabıǵı monopolııalardy retteý komıtetiniń Túrkistan oblysy boıynsha departamenti tekserý barysynda birqatar zań buzýshylyqty anyqtady.
Vedomstvo málimetinshe, jyl basynan beri 4 tabıǵı monopolııa sýbektisine jospardan tys tekserý júrgizilip, onyń bireýinde zań buzý faktisi tirkelgen.
– Tekserý nátıjesinde «Ótebaıgaz Aımaq» JShS-niń 54,1 mln teńgeden astam qarajatty zańsyz jolmen kiris retinde alǵany belgili boldy. Osyǵan baılanysty ákimshilik hattama toltyrylyp, is materıaldary Saryaǵash aýdanynyń ákimshilik quqyq buzýshylyqtar jónindegi mamandandyrylǵan sotyna joldandy. Departament tarapynan seriktestikke zań buzýshylyqty joıý týraly nusqama berilip, tutynýshylardan negizsiz alynǵan qarajatty tarıfti tómendetý arqyly qaıtarý talap etildi, – dedi departament basshysy Aqtileý Bekmuratov.
Spıkerdiń aıtýynsha, bıyl tabıǵı monopolııa jáne qoǵamdyq mańyzy bar naryq sýbektilerine qatysty 16 ákimshilik is qozǵaldy. Onyń ishinde 3 is sotta qaralyp, 7,8 mln teńgeden astam aıyppul salyndy. Al 10 is departament tarapynan qaralyp, 2 mln teńgeden astam aıyppul belgilendi. Qalǵan 3 is sotta qaralyp jatyr.
Sonymen qatar tarıfterdiń negizsiz ósýine jol berilmeı, naqty tómendetý jumystary júrgizilgen. Máselen, «Jylý» MKK boıynsha 2026 jyldyń 1 qańtarynan bastap tarıf 4 956,47 teńgeden 3 834,55 teńge/Gkal deıin nemese 22,6%-ǵa tómendetildi. Nátıjesinde 154 mln teńge kóleminde negizsiz kiris anyqtaldy. Al «Túrkistan Sý» kásiporny boıynsha 2025 jyldyń 1 jeltoqsanynan bastap tarıf 89,46 teńgeden 88,31 teńge/m³ deıin nemese 1,3%-ǵa tómendetilip, 10 mln teńge kóleminde negizsiz kiris tirkeldi.
Budan bólek, ótken jyldyń jeltoqsanynda Sý resýrstary jáne ırrıgatsııa mınıstrligi «Qazsýshar» RMK-nyń «Ońtústikaýyzsý» fılıalyna qatysty jospardan tys tekserý júrgizgen. Tekserý nátıjesinde zań buzý anyqtalyp, ákimshilik hattama toltyrylǵan.
– Fılıal bul sheshimmen kelispeı, is sotqa joldandy. Shymkent qalasynyń mamandandyrylǵan ákimshilik soty fılıaldy kináli dep tanyp, 6 291 200 teńge kóleminde aıyppul saldy. Alaıda apellıatsııalyq shaǵym qaralǵanymen, sot sheshimi ózgerissiz qaldyryldy, – dedi departament basshysy.
Budan buryn Túrkistanda 13 kárizdik tazalaý qondyrǵysynyń 9-y ekologııalyq qaýip tóndirip turǵanyn jazǵan edik.
