Túrkistan oblysynda selfı jasaımyn dep sýǵa batyp ketken qyzdyń máıiti tabyldy
TÚRKІSTAN. KAZINFORM — Jasóspirim fotosessııa jasaý kezinde abaısyzda Saıram sý ózenine qulap ketken. Qutqarýshylar qyzdyń denesin saǵat 16:10-da sýdan shyǵaryp, polıtsııa qyzmetkerlerine tapsyrdy.
Oqıǵa Qasqasý aýylynan 15 shaqyrym jerdegi «Saıram-Ógem» ulttyq parkiniń aýmaǵynda boldy. Dostarynyń aıtýynsha, jasóspirim fotosessııa jasaý kezinde abaısyzda Saıram sý ózenine qulap ketken.
Іzdestirý-qutqarý jumystaryna Túrkistan oblysy TJD-niń 54 qyzmetkeri, 1 júzý quraly jáne 4 tehnıkasy jumyldyryldy. Sondaı-aq, Túrkistan oblysy Polıtsııa departamentiniń 6 qyzmetkeri men 3 tehnıkasy jáne jergilikti atqarýshy organdardan 11 adam izdeý jumystaryn júrgizdi.
«Búgingi izdestirý jumystary Tólebı aýdanynda saǵat 16:00-da bastaldy. Sodan 16:10 shamasynda jasóspirim qyzdyń denesi Saıram sý ózeninen tabyldy. Máıitti polıtsııa qyzmetkerlerine tabystadyq. Azamattardy sýdaǵy qaýipsizdik erejelerin qatań saqtaýǵa shaqyramyz», - dedi Túrkistan oblysy Tótenshe jaǵdaılar departamenti bastyǵynyń orynbasary Ashat Erjanov.
Keshe Túrkistan oblysynda jasóspirim fotosessııa jasaý kezinde abaısyzda ózenge qulap, sýǵa batyp ketkeni týraly habarlaǵan edik.
Aıta keteıik, shildeniń basynda habarlaǵanymyzdaı, shomylý maýsymy bastalǵaly elimizde 70 adam sýǵa ketip mert bolǵan.
