Túrkistan oblysynda saýda oryndaryndaǵy 52 ónim synamasynan sáıkessizdik anyqtaldy
TÚRKІSTAN. KAZINFORM – Óńirde saýda aınalymynan 20 keliden astam ónim alynyp, kásipkerlerge 1 mln teńgege jýyq aıyppul salyndy.
Jyl basynan beri Túrkistan oblysynyń sanıtarııalyq-epıdemıologııalyq baqylaý departamentiniń mamandary Eýrazııalyq ekonomıkalyq odaqtyń tehnıkalyq reglamentteri talaptaryna sáıkestigin anyqtaý maqsatynda 733 ónim synamasyna zertteý júrgizdi. Onyń ishinde 198-i Qazaqstanda óndirilgen, 289-y Eýrazııalyq ekonomıkalyq odaq elderinen ákelingen, al 246-y basqa memleketterden jetkizilgen.
– Baqylaý maqsatynda satyp alý nátıjeleri boıynsha 52 synamadan Eýrazııalyq ekonomıkalyq odaqtyń tehnıkalyq reglamentteri men biryńǵaı sanıtarııalyq-epıdemıologııalyq jáne gıgıenalyq talaptaryna sáıkessizdik anyqtaldy. 49 jaǵdaıda ónim tańbalanýyna qatysty zań buzý tirkelse, 3 jaǵdaıda mıkrobıologııalyq lastaný faktileri anyqtaldy, – dep atap ótti vedomstvo ókilderi.
Mamandar talaptarǵa sáıkes kelmeıtin ónimderdi aınalymnan alý jáne keri qaıtarý týraly 26 qaýly shyǵarǵan. Nátıjesinde sórelerden jalpy salmaǵy 20,4 keli taýar alyndy.
– Qaýlylardyń oryndalýy jospardan tys tekserýler barysynda baqylaýǵa alyndy. Talaptardy oryndamaǵan eki kásipkerlik sýbektige jalpy somasy 605 500 teńge kóleminde aıyppul salyndy, – dep habarlady departament.
Anyqtalǵan zań buzýshylyqtyń sebepterin jáne ónimderdiń naryqqa túsý joldaryn anyqtaý maqsatynda kóterme jáne bólshek saýdamen aınalysatyn 27 kásipkerlik sýbekti tekserildi. Nátıjesinde tórt kásipker ákimshilik jaýapkershilikke tartyldy.
– Tórt kásipkerlik sýbektige jalpy somasy 389 250 teńge aıyppul salyndy. Tekserý sharalary zań buzýǵa jol berilgen jaǵdaılar men sebepterdi anyqtaýǵa múmkindik berdi. Sonymen qatar baqylaý satyp alýlary barysynda belgilengen talaptarǵa sáıkes kelmeıtin bir jalǵan qujat anyqtaldy, – delingen habarlamada.
Departament mamandary tutynýshylardy taýar tańdaýda muqııat bolýǵa jáne qaptamadaǵy aqparatty mindetti túrde tekserýge shaqyrdy.
– Dúkennen ónim satyp alar kezde onyń tańbalanýyna nazar aýdarý qajet. Ónimniń ataýy, óndirilgen kúni, saqtaý merzimi, quramy, taǵamdyq qasıetteri men erekshelikteri, sondaı-aq óndirýshi týraly málimetter memlekettik jáne orys tilderinde kórsetilýi tıis. Qaptamadaǵy EAS belgisi ónimniń qajetti zerthanalyq synaqtardan ótkenin jáne Eýrazııalyq ekonomıkalyq odaqtyń tehnıkalyq reglamentteri talaptaryna sáıkes keletinin bildiredi, – dep túsindirdi mamandar.
Buǵan deıin almatylyqtar qandaı taýar men qyzmetke jıi shaǵymdanatyny týraly jazǵan edik.
