Túrkistan oblysynda saýda ınfraqurylymyn damytýǵa 3,4 mlrd teńge tartyldy

ASTANA. KAZINFORM – Memlekettik qoldaý aıasynda Túrkistan oblysynda saýda ınfraqurylym jańartý jáne salý jumysyna 3,4 mlrd teńge tartyldy. Bul týraly Saýda jáne ıntegratsııa mınıstrligi habarlady. 

Óńir kásipkerleri jyl basynan Saýda jáne ıntegratsııa mınıstrligi tarapynan «Damý» qory arqyly beriletin memlekettik qoldaý tetigin paıdalanyp, 50 saýda nysanyn jańǵyrtý, salý jáne qajetti qural jabdyqtar alý, aınalym qarajatyn tolyqtyrý úshin ekinshi deńgeıli bankterden nesıe alǵan. Memlekettik qoldaý baǵdarlamasyna saı osy maqsatta alynǵan nesıeniń paıyzdyq mólsherlemesiniń 10,75 paıyzyn Saýda jáne ıntegratsııa mınıstrligi sýbsıdııalaıdy.

Jetisaılyq kásipker Anýarbek Balǵabaev zamanaýı saýda formatyna saı bazar qurylysyn júrgizý úshin memlekettik qoldaý alǵan.

— Bul bazardyń qurylysyn 2023 jyldyń sońynda bastadym. Qurylystyń sońǵy detaldary áli de júrip jatyr. Bazarda 700 zamanaýı saýda orny bar. Qurylysqa alǵashynda óz qarajatymdy saldym. Keıin Úkimetten «Damý» arqyly kómek boldy. Baǵdarlama bizge unady, — dedi kásipker.

3,42 gektar aýmaqqa salynǵan Grand Park Zhetisay bazary Saýda mınıstrliginiń bazar qurylysyna qoıǵan talaptaryna saı salynǵan saýda ınfraqurylymynyń biri. Munda saýda oryndary arnaıy jeldetkishpen, avtoturaq pen órt qaýipsizdik talaptaryna saı datchıkter, gıdranttarmen tolyq jabdyqtalǵan.

Saýda jáne ıntegratsııa mınıstrligi 2029 jylǵa qaraı zamanýı saýda formatynyń úlesin 70 paıyzǵa ulǵaıtýdy kózdep otyr. Qazir bul kórsetkish 41 paıyzdy quraıdy. Jyl sońyna deıin eldegi saýda bazarlaryn jańǵyrtý jumysy aıaqtalýy qajet. Bıyl Qazaqstanda 100 saýda bazary jańǵyrtýdan ótedi, onyń ishinde 8 bazar Túrkistan oblysynda ornalasqan. Óńirdegi bazarlardy jańǵyrtý jumysynyń aldyn-ala nástıjesin kórý úshin QR SIM Saýda komıteti tóraǵasynyń orynbasary Ernur Jáýtikbaev oblys bazarlaryn aralady.

Túrkistan qalasyndaǵy «Qýanysh» bazary aýmaǵyna órt sóndirý avtokólikteri men tutynýshylardyń kólikteri ońaı kirip-shyǵýy úshin bazar qaqpasy avtomattandyrylǵan júıege qosyldy, sondaı-aq bazardaǵy saýdagerlerge arnalǵan jabyq avtoturaq salyndy. «Jaýǵashty» bazary ákimshiligi bazar aýmaǵynda qoıma qurylysyn aıaqtap, qoldanysqa berdi. «ıAssy» bazarynda jańǵyrtý jumystary 80%-ǵa aıaqtalǵan. Qazirgi tańda órt kezinde dabylyn datchıkterin ornatý jumystary júrip jatyr. Dál osyndaı jumys «Altyn bulaq» bazarynda da jalǵasýda.
Al Saryaǵash aýdanyndaǵy «Dáýlet»bazary jańǵyrtý jumysynyń ekinshi kezeńin júrgizip jatyr. Qurylys jumystary 80%-ǵa aıaqtalǵan. Qazirgi tańda qosymsha ǵımarat qurylysy júrgizilýde. Qazyǵurt aýdanyndaǵy «Eshanqul-ata» bazyrnda jańǵyrtý jumystary 80%-ǵa aıaqtalǵan. Órt qaýipsizdik talaptary boıynsha jumys júrip jatyr.

— Bazarlardy jańǵyrtý birinshi kezekte bıznestiń áleýmettik jaýapkershiligi. Saýda mınıstrligi qajetti zańnamany jasaqtady, memlekettik qoldaý tetigin iske qosty. Sondyqtan kásipkerler jyl sońyna deıin jańǵyrtý jumystaryn aıaqtaýy kerek. Bul jumys tutynýshy men satýshynyń qaýipsizdigi ǵana emes. Bul salyqtyq túsimderdiń ashyqtyǵy men jasyryn ekonomıka úlesin azaıtýdyń joly, — dedi Ernur Jáýtikbaev. 

Aıta ketelik Qazaqstannyń saýda balansynyń profıtsıti birinshi jartyjyldyqta 32,9%-ǵa qysqardy.