Túrkistan oblysynda salynǵanyna bir jyl tolmaǵan ǵımarattyń qabyrǵalary jaryla bastady
TÚRKІSTAN. KAZINFORM — Saıram aýdany Jibek joly aýyldyq okrýgi ákimdiginiń ǵımaraty paıdalanýǵa berilgenine bir jyl tolmaı jatyp, qabyrǵalarynda jaryqtar paıda bolǵan.
Aýdan ákimdiginiń málimetinshe, atalǵan ǵımarattyń qurylysyn 2024-2025 jyldar aralyǵynda merdiger uıym — «Dáýlet» JShS júrgizgen.
— Nysanǵa júrgizilgen tekserý barysynda qabyrǵalarda jaryqtar men oıyqtardyń paıda bolǵany, sondaı-aq ishki qabyrǵalardyń shógý faktileri anyqtaldy. Osyǵan baılanysty taıaýda merdiger mekemege kemshilikterdi joıý jáne qalpyna keltirý jumystaryn júrgizý jóninde tapsyrma berildi, — delingen vedomstvo usynǵan aqparatta.
Sonymen qatar, mamyr aıyna deıin qurylysty retke keltirý boıynsha merdiger uıymnan kepildeme alynǵan.
Qazirgi ýaqytta anyqtalǵan kemshilikterdi joıý úshin merdiger uıymdy mindetteý baǵytynda zańnamaǵa sáıkes tıisti sharalar qabyldanyp jatyr.
Budan buryn Saıram aýdany Qarasý aýyldyq okrýgine qarasty Áıteke bı aýylynda kópir mańyndaǵy sý arnasy aýdandyq mańyzy bar avtomobıl jolyna qaýip tóndirip turǵanyn jazǵan edik.