Túrkistan oblysynda Respýblıka kúnine oraı 17 áleýmettik nysan ashylady
Túrkistan oblysynda Respýblıka kúnine oraı 17 áleýmettik nysan ashylady. Bul týraly Túrkistan oblysy qoǵamdyq damý basqarmasynyń basshysy Erlan Kúzembaev málimdedi, dep habarlaıdy Kazinform.
25 qazan kúni Túrkistan qalasy men barlyq aýdan-qala ortalyqtarynda Memlekettik týdy kóterý rásimi ótedi. Sonymen qatar, «Janashyr júrek» aktsııasy aıasynda túrli qaıyrymdylyq sharalar uıymdastyrylady. Mereke kúni aýdan-qalalarda 17 áleýmettik mańyzdy nysan ashylady. Olardyń qatarynda Jetisaı aýdanynda fýtbol alańshasy, Saryaǵash aýdanyndaǵy dárigerlik ambýlatorııa, Shardara aýdanyndaǵy mádenıet úıi sekildi nysandar bar.
«Respýblıka kúni ulttyq mereke retinde ótken jyly alǵash ret atalyp ótti. Dál osy kúni Qazaqstannyń memlekettik egemendigi týraly Deklaratsııa qabyldanǵan bolatyn. Bul elimizdiń Táýelsizdik jolyndaǵy alǵashqy qadamy edi. Endeshe bul ataýly kúndi eleýli etip ótkizý mańyzdy. Osyǵan oraı, Túrkistan oblysynda Respýblıka merekesi qarsańynda arnaıy jospar bekitildi. Jospar boıynsha 70-ke jýyq is-shara ótedi», - dedi Erlan Baqytjanuly.
Brıfıngke qatysqan Túrkistan oblysynyń mádenıet jáne týrızm basqarmasynyń basshysy Ázimhan Qoılybaev mereke qarsańynda óńirde ótetin mádenı is-sharalarǵa toqtaldy.
«25 qazan – Respýblıka kúni» merekesine oraı Túrkistan oblysynyń mádenıet jáne týrızm basqarmasy tarapynan birqatar mádenı is-shara uıymdastyrylýda. Atap aıtsaq, Halyqaralyq «Voice of Turan-2023» qazaq ánderi festıvali bastaldy. Sonymen qatar, mereke qarsańynda 21-22 qazan kúnderi saǵat 19:00-de Túrkistan mýzykalyq drama teatrynda kezekti III maýsymnyń ashylýy ótedi. Oblystaǵy barlyq mýzeıde 20-24 qazan aralyǵynda túrli taqyrypta kórme, lektsııalar sekildi is-sharalar uıymdastyrylady. Al 24 qazan kúni «Kongress Holl» kesheninde saǵat 15:00-de 25 qazan – Respýblıka kúnine arnalǵan oblystyq merekelik shara ótedi», - dedi Ázimhan Qoılybaev.
