Túrkistan oblysynda referendým kúni 16 myńnan asa múgedektigi bar adam daýys berýge quqyly
TÚRKІSTAN. KAZINFORM — Túrkistan oblysynda múgedektigi bar 103 myńǵa jýyq adam turady. Olardyń 16 myńnan astamy daýys berý quqyǵyna ıe.
Túrkistan oblystyq aýmaqtyq referendým komıssııasynyń málimetinshe, respýblıkalyq referendýmǵa qatysý úshin múgedektigi bar adamdar úshin qolaıly jaǵdaı jasalǵan.
— Oblysta daýys berý quqyǵyna ıe múgedektigi bar adamdardyń sany — 16 601. Onyń ishinde 4 myń adam kreslo-arbalardy paıdalanady. Zaǵıp jáne nashar kóretinder — 8171, al estý qabileti tómen jandar — 4430. Óńirdegi barlyq 948 referendým ýchaskesi tolyǵymen «Qoljetimdi orta» ınteraktıvti qoljetimdilik kartasyna engizilgen, — dep habarlady oblystyq aýmaqtyq referendým komıssııasy.
Jalpy óńirde erekshe qajettilikteri bar azamattar úshin kedergisiz orta qalyptastyrý baǵytynda qajetti sharalar qabyldanǵan.
— Barlyq ýchaskelerde tirek-qımyl apparaty fýnktsııalary buzylǵan azamattardyń, onyń ishinde kreslo-arbalardy paıdalanýshylardyń qoljetimdiligi eskerilip, jasyryn daýys berýge arnalǵan kabınalar jáne múgedektigi bar adamdarǵa arnalǵan arnaıy buryshtar qarastyrylǵan, — delingen habarlamada.
Sondaı-aq oblysta referendým ýchaskelerinde qoǵamdyq birlestikterdiń qatysýymen múgedektigi bar azamattarǵa jasalǵan jaǵdaılarǵa monıtorıng júrgizilip jatyr.
Budan buryn Túrkistan oblysynda 1,2 mln-ǵa jýyq azamat referendýmda daýys bere alatynyn jazǵan edik.
