Túrkistan oblysynda prokýratýra bıýdjet qarajatynyń jymqyrý faktisin anyqtady
ASTANA. KAZINFORM — Túrkistan oblysy Saryaǵash aýdanynyń prokýratýrasy aýdandyq jumyspen qamtý jáne áleýmettik baǵdarlamalar bóliminiń «Aıaly alaqan» jáne «Qamqor» áleýmettik qyzmetter kórsetý ortalyqtary kommýnaldyq memlekettik mekemelerinde bıýdjet qarajatynyń maqsatty ári zańdy jumsalýyna taldaý júrgizdi.
Taldaý barysynda memlekettik satyp alý sharttary boıynsha is júzinde jetkizilmegen taýarlar men oryndalmaǵan qyzmetter úshin bıýdjet qarajatynyń aýdarylǵany anyqtaldy.
Atap aıtqanda, mekeme laýazymdy tulǵalary birqatar jeke kásipkerlermen kelisip, naqty jetkizilmegen taýarlar men kórsetilmegen qyzmetterdi qabyldaý aktilerine qol qoıý arqyly bıýdjet qarajatyn negizsiz aýdarǵan.
Prokýratýranyń bastamasymen taǵaıyndalǵan sot-býhgalterlik saraptama qorytyndysyna sáıkes memleketke keltirilgen materıaldyq zalal kólemi 13,3 mln teńge.
Atalǵan fakti boıynsha Qylmystyq kodekstiń 189-babynyń 3-bóligimen (senip tapsyrylǵan bóten múlikti ıemdený nemese talan-tarajǵa salý) sotqa deıingi tergep-tekserý bastaldy.
Qazirgi tańda qylmystyq is boıynsha qajetti tergeý áreketteri júrgizilip jatyr.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta ketelik Atyraý prokýratýrasy memleketke mıllıondaǵan aktıvterdi qaıtardy.
