Túrkistan oblysynda prokýratýra 41 zańsyz ákimshilik isti kelisýge jol bermedi

TÚRKІSTAN. KAZINFORM – Óńirde ınvestorlardyń quqyqtaryn qorǵaý maqsatynda «prokýrorlyq súzgi» tetigi kúsheıtilip, negizsiz tekserýler men ákimshilik isterge tosqaýyl qoıyldy.

Oblystyq prokýratýranyń málimetinshe, sońǵy eki jylda óńirde memlekettik organdardyń 300-ge jýyq sheshimi zerdelenip, nátıjesinde 62 ákimshilik isti qozǵaýdan jáne 21 tekserýdi taǵaıyndaýdan bas tartylǵan.

– Investorlardyń quqyqtaryn qorǵaý maqsatynda prokýratýra organdary «prokýrorlyq súzgi» tetigin júıeli túrde qoldanyp keledi. Ótken jyly atalǵan tetik arqyly 41 zańsyz ákimshilik isti kelisýden bas tartylyp, 12 ınvestorǵa qatysty negizsiz tekserýler toqtatyldy, – delingen vedomstvo taratqan aqparatta.

Sonymen qatar 2024 jyldan beri prokýratýra bastamasymen memlekettik organdarmen birlesip ótkizilgen «Invest-Karavan» aktsııalary aıasynda 60 kóshpeli is-shara uıymdastyrylyp, 150 ınvestormen tikeleı suhbat júrgizildi jáne 42 ınvestkeıstiń máselesi sheshimin tapty.

Budan buryn habarlaǵandaı, ótken jyly Qazaqstanda ınvestorlar quqyǵyn qorǵaýǵa arnalǵan arnaıy «prokýrorlyq súzgi» mehanızmi iske qosylǵan bolatyn.

Oǵan sáıkes, memlekettik organdar Bas prokýratýranyń aldyn ala kelisiminsiz ınvestorlarǵa qatysty tekserý júrgizýge, ákimshilik is qozǵaýǵa, talap aryz berýge nemese qandaı da bir shekteý qoıýǵa quqyly emes.