Túrkistan oblysynda Prezıdent tapsyrmalary qalaı oryndalady
TÚRKІSTAN. KAZINFORM – Túrkistan oblysynyń ákimi Nuralhan Kósherovtiń tóraǵalyǵymen májilis ótip, Memleket basshysynyń 10 aqpanda ótken Úkimettiń keńeıtilgen otyrysynda bergen tapsyrmalaryn iske asyrý joldary talqylandy.
Jıynǵa oblys ákiminiń orynbasarlary, basqarma basshylary, aýdan jáne qala ákimderi, aýmaqtyq departament jetekshileri qatysty.
Májiliste Memleket basshysy aıqyndaǵan 7 negizgi baǵyt – ınflıatsııany tómendetý, jańa Salyq kodeksin tıimdi engizý, tsıfrlyq tehnologııalardy jan-jaqty engizý, jańa ınvestıtsııalyq kezeńdi bastaý, zamanaýı ónerkásiptiń negizin qalyptastyrý, kásipkerlikti damytý, kólik logıstıkasyn jetildirý jáne elektr energııasy tapshylyǵyn azaıtý máseleleri jan-jaqty qaraldy.
– Memleket basshysynyń tapsyrmalaryn júıeli ári nátıjeli oryndaýǵa tıispiz. Óńirge ınvestıtsııa tartý boıynsha júıeli jumystar júrgizýdi, barlyq salaǵa tsıfrlyq tehnologııalar men jasandy ıntellektini engizýdi jandandyrýdy, energetıka tapshylyǵyn joıý maqsatynda naqty jobalardy júzege asyrýdy, salyq-bıýdjet saıasatyn retteýdi tapsyramyn. Eldi mekenderdi qajetti ınfraqurylymmen qamtamasyz etý, agroónerkásip kesheniniń áleýetin arttyrý, áleýmettik saladaǵy zańsyzdyqtardy retteý boıynsha keshendi shara qabyldaý qajet. Prezıdent tapsyrmalaryn merziminde oryndaý úshin arnaıy is-shara josparyn ázirleý kerek. Investıtsııa tartý, jumys oryndaryn kóbeıtý, aýyl sharýashylyǵy ónimderin tereń óńdeý – negizgi basymdyqtarymyz bolyp qala beredi, – dedi oblys ákimi Nuralhan Kósherov.
Kún tártibindegi máseleler boıynsha oblys ákiminiń birinshi orynbasary Zulpyhar Joldasov, oblys ákiminiń orynbasary Qanat Qaıypbek, oblys ákimi apparatynyń basshysy Erkebulan Daýylbaev, Túrkistan oblysy boıynsha memlekettik kirister departamenti basshysynyń orynbasary Berik Qaıpov baıandama jasady. Olar óńirde atqarylyp jatqan jumystardy baıandap, aldaǵy kezeńge arnalǵan naqty josparlardy usyndy.
Inflıatsııany tómendetý baǵytynda áleýmettik mańyzy bar azyq-túlik taýarlarynyń baǵasyn turaqtandyrý, jańa óndirister ashý, jumys oryndaryn qurý jáne ishki naryqty otandyq ónimmen qamtamasyz etý sharalary pysyqtaldy. Baǵanyń negizsiz ósýine jol bermeý, turaqtandyrý qorlarynyń tıimdi jumysyn qamtamasyz etý tetikteri qaraldy.
Jańa Salyq kodeksin engizý aıasynda fıskaldyq saıasattyń tıimdiligin arttyrý, bıýdjetti retke keltirý jáne salyqtyq ákimshilendirýdi tsıfrlandyrý mindetteri aıqyndaldy. 2026 jyly jergilikti bıýdjetke 225 mlrd teńge túsim túsirý josparlanyp otyr. Bul mejege ekonomıkalyq belsendilikti arttyrý jáne kásipkerlerge qolaıly orta qalyptastyrý arqyly qol jetkizý kózdelgen.
Tsıfrlyq memleket qurý baǵytynda barlyq salalardy tsıfrlandyrý, jasandy ıntellekt elementterin engizý jáne aqparattyq júıelerdiń ózara yqpaldastyǵyn qamtamasyz etý máseleleri kóterildi. Ásirese bilim berý men densaýlyq saqtaý salalaryndaǵy aqparattyq júıelerdi ıntegratsııalaý, bıýdjet qarajatynyń tıimdi jumsalýyn qamtamasyz etý jáne ashyqtyqty kúsheıtý boıynsha naqty tapsyrmalar berildi.
Investıtsııalyq saıasat boıynsha 2025 jyldyń qorytyndysymen negizgi kapıtalǵa tartylǵan ınvestıtsııa kólemi 1,7 trln teńgeni qurap, jospar 121,6 paıyzǵa oryndalǵan. Al 2026–2029 jyldarǵa jalpy quny 2,8 trln teńgeni quraıtyn 111 ınvestıtsııalyq jobanyń pýly qalyptastyrylǵan. Investıtsııa tartý aýdan jáne qala ákimderiniń negizgi kórsetkishteriniń biri bolyp qala beretini eskertildi.
Ónerkásip salasynda 2025 jyly óndirilgen ónim kólemi 1 596 mlrd teńgege jetip, 13,8 paıyz ósim kórsetken. Óńdeý ónerkásibiniń úlesi 47,5 paıyzdy quraıdy. Importty almastyratyn jáne tereń óńdeýge baǵyttalǵan jobalardy iske asyrýǵa basymdyq berilmek. Agrarlyq áleýetti tıimdi paıdalaný jáne veterınarlyq qaýipsizdikti qamtamasyz etý máseleleri de nazarda.
Óńirde 215 myńǵa jýyq shaǵyn jáne orta kásipkerlik sýbektisi jumys isteıdi. Kásipkerlikti damytý, memlekettik qoldaý sharalaryn keńeıtý jáne tsıfrlyq quraldardy engizý arqyly bıznesti júrgizý sharttaryn jeńildetý mindetteri belgilendi.
Kólik logıstıkasyn damytý baǵytynda halyqaralyq tranzıttik dálizderdiń áleýetin tıimdi paıdalaný, servıstik jáne qoıma ınfraqurylymyn damytý, «Darbaza – Maqtaaral» temirjol jelisin merziminde aıaqtaý tapsyryldy. Sonymen qatar Túrkistan áýejaıyn básekege qabiletti halyqaralyq habqa aınaldyrý boıynsha keshendi jumystar júrgizý qajettigi aıtyldy.
Energetıka salasynda oblystyń elektr energııasyn tutyný kólemi 445 MVt bolsa, onyń 75 paıyzy syrtqy kózderden jetkiziledi. Jalpy qýaty 2,4 GVt bolatyn 6 iri jobany iske asyrý josparlanǵan. Energetıkalyq táýelsizdikti qamtamasyz etý óńirdiń turaqty damýynyń basty sharty retinde belgilendi.
Májilisti qorytyndylaǵan oblys ákimi Prezıdent tapsyrmalaryn oryndaý ár basshynyń jeke jaýapkershiligi ekenin atap ótti. Jıyn qorytyndysymen barlyq baǵyt boıynsha naqty tapsyrmalar hattamaǵa engizilip, arnaıy is-shara josparyn ázirleý tapsyryldy.