Túrkistan oblysynda polıtsııa saýdagerden 45 keliden astam nasybaı tárkiledi
TÚRKІSTAN. KAZINFORM – Túrkistan oblysynda polıtsııa saýdagerden 45 keliden astam nasybaı tárkiledi, dep habarlaıdy Polisia.kz.
Maqtaaral aýdanynda polıtsııa bóliminiń ýchaskelik polıtsııa ınspektorlary reıd júrgizý barysynda saýdagerdiń saýda orny men úıindegi garajynan 50-den astam baklashkaǵa salynǵan, ıaǵnı 45 keliden astam nasybaı ónimin tapty. Ortalyq bazarda sypyrǵy satýmen aınalysatyn turǵyn nasybaı ónimin arnaıy baklashkalarǵa salyp, satý úshin ázirlep qoıǵan.
Qazirgi tańda atalǵan azamatqa qatysty «Taýarlarmen nemese ózge de zattarmen zańsyz saýda jasaý» babymen shara kórildi. Tárkilengen tyıym salynǵan zattar joıyldy.
Ýchaskelik polıtsııa ınspektorlary halyq arasynda nasybaıdy tutynýdyń zııany jáne ony satýǵa tyıym salynǵany týraly túsindirý jumystaryn júrgizýde. Eger saýda erejelerin buzý faktileri anyqtalǵan jaǵdaıda kináli tulǵalar zańda kózdelgen jaýapkershilikke tartylatynyn turǵyndarǵa aıtyldy.
Aıta ketsek, oblys aýmaǵynda ákimshilik ýchaskelerde quqyq buzýshylyqtardyń aldyn alý jónindegi sharalardy kúsheıtý, onyń ishinde erkin saýda jasaýǵa zańmen tyıym salynǵan nemese shektelgen taýarlarmen saýda jasaý derekterin anyqtaý maqsatynda «Ýchaske» jedel-profılaktıkalyq is-sharasy ótkizilip jatyr.
