Túrkistan oblysynda polıtseı para aldy degen kúdikpen ustaldy
TÚRKІSTAN. KAZINFORM – Áleýmettik jelilerde Túrkistan oblysy Sozaq aýdanynda UQK qyzmetkerleri polıtseıge jeke tintý júrgizip, tekserip jatqan kezinen beınejazba tarady. Kúdikti qaltalaryn aqtaryp kórsetip turady da, qashýǵa áreket jasaıdy.
Bul oqıǵaǵa qatysty Túrkistan oblysy Polıtsııa departamenti resmı túsinikteme berdi. Departamenttiń Ózindik qaýipsizdik basqarmasy UQKD-men birlesip, aýdandyq polıtsııa bóliminiń qyzmetkerin quqyqqa qaıshy áreketter jasady degen kúdikpen ustaǵan.
- Qazirgi ýaqytta kúdikti ýaqytsha ustaý ızolıatoryna qamaldy. Atalǵan fakt boıynsha bolǵan oqıǵanyń búkil mán-jaıyn anyqtaýǵa baǵyttalǵan sotqa deıingi tergeý amaldary júrip jatyr. Osy rette polıtsııa departamentinde tártiptik komıssııanyń otyrysy ótkizilip, onyń sheshimimen qyzmetker teris sebeptermen ishki ister organdarynan shyǵaryldy, - delingen resmı habarlamada.
Jelide taraǵan aqparatqa sáıkes, ustalǵan polıtseı jergilikti turǵynda tirkelmegen ańshylyq qarý baryn anyqtaǵan. Qylmystyq jaýapkershilikke tartpaý úshin odan 200 myń teńge talap etken.
Budan buryn Túrkistan oblysynda eki polıtseı tárkilengen esirtkini satyp jatqan jerinen ustalǵanyn jazǵan edik.