Túrkistan oblysynda polıtsııa 153 mln teńge bereshegin tólemeı júrgen júrgizýshini ustady
TÚRKІSTAN. KAZINFORM - Túrkistan oblysynyń polıtsııasy «Qorǵaý – qaýipti júrgizýshi» baǵdarlamasynyń kómegimen 153 mln teńge aıyppulyn tólemeı júrgen azamatty anyqtady, – dep habarlaıdy Polisia.kz.
Túrkistan qalalyq polıtsııa basqarmasynyń patrýldik polıtsııa qyzmetkerleri «Qorǵaý – qaýipti júrgizýshi» baǵdarlamasy arqyly qala aýmaǵynda kúndelikti reıdtik-profılaktıkalyq is-shara júrgizedi.
Máselen, kezekti jumys kúni tártip saqshylaryna S.Qojanov kóshesiniń boıynda 153 mıllıon teńge bereshegi bar Ravon Nexia R3 avtokóligine qatysty dabyl tústi.
Belgili bolǵandaı, júrgizýshi 153 mıllıon teńgeniń 700 myńyn jol qozǵalysy erejesin buzǵany úshin aıyppul retinde arqalaǵan. Onyń basym bóliginde aqyly jol, jyldamdyq arttyrý, ruqsat etilmegen orynǵa kólik qoıý t.b quqyq buzýshylyqtar bar. Qalǵany bank pen alıment boıynsha bereshek ekeni rastaldy.
Polıtseıler avtokólik júrgizýshisimen aıyppuldardy ýaqytyly tóleý boıynsha túsindirý jumystaryn júrgizdi. Kólik aıypturaqqa qoıyldy.
Aıta ketsek, sońǵy aıda Túrkistan oblysynyń polıtsııasy «Qorǵaý» baǵdarlamasynyń kómegimen aıyppulyn tólemegen 100-ge jýyq júrgizýshini anyqtap, kólikterdi aıypturaqqa qoıdy. Bul baǵyttaǵy jumys aldaǵy ýaqytta da jalǵasyn tabady.
