Túrkistan oblysynda er adam polıtseımen atysyp oqqa ushty

TÚRKІSTAN. KAZINFORM — Túrkistan oblysy Maqtaaral aýdanynyń polıtsııasyna jergilikti turǵynnan onyń burynǵy jubaıy qarýmen kelip, balalarynyń kózinshe janjal shyǵarǵany týraly habarlama kelip tústi.

Polıtsııa kelgen ýaqytta myltyq ustaǵan er adam júgirip shyǵyp, kórshi úıdiń aýlasyndaǵy saraıǵa tyǵyldy. Zańsyz áreketter men basqalarǵa qaýip tóndirmeý úshin aýmaq tolyǵymen qorshaýǵa alyndy.

— Polıtsııa qyzmetkerleriniń zańsyz áreketterdi toqtatý týraly zańdy talaptaryna qaramastan, er azamat baǵynýdan bas tartyp polıtseılerdiń birin jaraqattap, oq jaýdyrdy. Shabýylǵa toıtarys berý jáne ómirge qaýip tóndiretin áreketterdiń jolyn kesý úshin polıtseıler aýaǵa eskertý oqtaryn atty. Alaıda quqyq buzýshy eskertýlerge toqtamaǵannan keıin, zańnamaǵa sáıkes tabeldik qarý qoldanyldy. Quqyq buzýshy alǵan jaraqatynan oqıǵa ornynda qaıtys boldy, — delingen Túrkistan oblysy Polıtsııa departamenti taratqan resmı aqparatta.

Tekserý barysynda tirkelmegen sholaq myltyq, patrondar men gılzalar tárkilendi. Atalǵan fakti boıynsha qylmystyq is qozǵaldy.

Qazirgi ýaqytta bolǵan oqıǵanyń barlyq mán-jaılaryn anyqtaý úshin qajetti jedel-tergeý is-sharalary júrgizilip jatyr. Tergeý barysy Polıtsııa departamenti basshylyǵynyń baqylaýynda.

Tergeý múddesindegi ózge de aqparattar QR QPK-niń 201-babyna sáıkes jarııa etilmeıdi.

Budan buryn Túrkistan qalasynda 500 oryndyq tergeý ızolıatory salynatyny týraly jazǵan edik.