Túrkistan oblysynda polıtseıler men olardyń sybaılastary sottaldy
TÚRKІSTAN. KAZINFORM – Túrkistan oblysynda qyzmettik ókilettigin teris paıdalanǵan polıtseıler men olardyń sybaılastaryna qatysty sot úkimi shyqty. Іste zańsyz toqtatylǵan kólik, urlanǵan maınıng qurylǵylary jáne mıllıondaǵan shyǵyn týraly aıtylǵan.
Túrkistan oblysynyń qylmystyq ister jónindegi mamandandyrylǵan aýdanaralyq sotynda tártip saqshylary men olardyń sybaılastaryna qatysty is alqabılerdiń qatysýymen qaraldy.
Sot málimetinshe, oqıǵa 2024 jyldyń qarasha aıynda bolǵan. Barlyǵy alty adam aıyptalǵan. Olardyń tórteýi «Qorqytyp alý» jáne «Bılikti nemese laýazymdyq ókilettikti asyra paıdalaný» baptarymen, al ekeýi «Urlyq» babymen jaýapqa tartylǵan.
– Sottalýshylar B. N. jáne A. QK-niń 194-baby 4-bóliginiń 2-tarmaǵymen kinásiz dep tanylyp, aqtaldy. N. jáne A.-nyń áreketteri QK-niń 362-baby 4-bóliginiń 3-tarmaǵynan QK-niń 361-baby 4-bóliginiń 3-tarmaǵyna qaıta saralanyp, árqaısysyna belgili laýazymdardy atqarý quqyǵynan ómir boıyna aıyra otyryp, 3 jyl merzimge bas bostandyǵynan aıyrý jazasy taǵaıyndaldy. QK-niń 49-babynyń talabyna sáıkes, N. polıtsııa maıory sheninen, al A. podpolkovnıgi sheninen aıyrý túrindegi qosymsha jaza taǵaıyndaldy, – delingen oblystyq sot habarlamasynda.
Sondaı-aq «Bılikti nemese laýazymdyq ókilettikterdi asyra paıdalaný» babymen aıyptalǵan taǵy bir adamnyń áreketi «Laýazymdyq ókilettikterdi teris paıdalaný» babyna qaıta saralanǵan. Oǵan belgili bir laýazymdardy atqarý quqyǵynan ómir boıyna aıyra otyryp, 3 jyl merzimge bas bostandyǵynan aıyrý jazasy taǵaıyndaldy.
Al «Urlyq» babymen aıyptalǵan eki adamnyń birine raqymshylyq zańy qoldanylyp, 4 jyl 9 aı 18 kún merzimge bas bostandyǵynan aıyrý jazasy taǵaıyndaldy. Ekinshisine 4 jyl jaza belgilenip, ol shartty dep tanyldy.
– Sottalýshy B. polıtsııa qyzmetkerleri – sottalýshylar N. men A.-ǵa Túrkistan oblysy Túlkibas aýdanynan ótip bara jatqan avtokólikte esirtki zat bar bolý múmkin degen aqparat bergen. Sottalýshylar N. men A. laýazymdyq ókilettikterdi teris paıdalanyp, aqparatty resmı túrde tirkemeı, basshylaryna baıanat arqyly baıandamaı, tıisti zańdy is sharalardy ótkizbeı, sottalýshy B.-ny kómektesýshi retinde tartyp avtokólikti zańsyz toqtatqan. Ony aıyppul avtoturaǵyna ornalastyryp, esirtki zat jóninde aqparat qýattalmaǵan soń oqıǵa bolǵan jerden ketip qalǵan. Al sottalýshylar M. men E. avtoturaqta turǵan joǵaryda kórsetilgen júk avtokóliginiń prıtsebine zańsyz kirip, ondaǵy 1169 dana maınıng qurylǵylaryn urlap, jábirlenýshige jalpy 100 782 997 teńge asa iri mólsherde shyǵyn keltirgen, – delingen sot málimetinde.
Sot sheshimimen jábirlenýshige keltirilgen 67 mln teńgeden astam materıaldyq shyǵyn sottalýshylardan ortaq tártippen óndiriletin boldy.
Úkim zańdy kúshine engen joq.
Budan buryn Talǵarda polıtsııa qyzmetkeri salǵyrttyǵy úshin sottalǵanyn jazǵan edik.
