Túrkistan oblysynda pııaz jınaý naýqany bastaldy
ASTANA. KAZINFORM — Túrkistan oblysynyń Saıram aýdanynda erte pisetin kókónis daqyldaryn jınaý naýqany qolǵa alyndy, dep habarlaıdy Aýyl sharýashylyǵy mınıstrliginiń baspasóz qyzmeti.
Jergilikti aýyl sharýashylyǵy taýar óndirýshileri pııaz ónimin jınaýǵa kirisip, sonymen qatar qyryqqabatty jappaı jınaýǵa daıyndyq jumystaryn aıaqtaýǵa jaqyn. Kókónis sharýashylyǵy aýdannyń agrarlyq sektoryn kórkeıtýdegi basym baǵyttardyń biri bolyp qala beredi.
— Bıyl pııaz egilgen alqap kólemi 900 gektarǵa jetti. Ár gektardan orta eseppen 28 tonna ónim alynatyn bolsa, jalpy 25,2 myń tonnaǵa jýyq ónim jınaý josparlanyp otyr. Qyryqqabat 616 gektar jerge egilgen. Aldyn ala boljam boıynsha, ortasha ónimdilik gektaryna 237 tsentnerdi qurap, shamamen 14,6 myń tonna ónim alýǵa múmkindik beredi, — delingen mınıstrlik habarlamasynda.
Qazir sharýashylyqtar jınaý tehnıkasyn, logıstıkany daıyndaý jumystaryn aıaqtap, jumysshylardy jasaqtap jatyr.
Fermerlerdiń aıtýynsha, qolaıly aýa raıy jaǵdaılary men agrotehnıkalyq sharalardyń der kezinde júrgizilýi kókónis daqyldarynyń ónimdiligine yqpal etip otyr.
Vedomstvo atap ótkendeı, óńirde kókónis sharýashylyǵyn damytý, zamanaýı ósirý tehnologııalaryn engizý jáne aýyl sharýashylyǵy óndirisiniń tıimdiligin arttyrý baǵytynda júıeli jumystar jalǵasady.
Buǵan deıin Túrkistan oblysynda qarbyz alqabynan alǵashqy ónim jınala bastaǵanyn jazǵanbyz.
