Túrkistan oblysynda pırotehnıkany durys paıdalanbaý saldarynan eki bala jaraqattandy

TÚRKІSTAN. KAZINFORM — Túrkistan oblysy, Saryaǵash aýdanynda pırotehnıkalyq buıymdardy qaýipsizdik talaptaryn saqtamaı qoldaný saldarynan eki jasóspirim jaraqattandy. 

Jasóspirimder pırotehnıkalyq buıymdy eresekterdiń baqylaýynsyz paıdalanǵan.

— Olar ártúrli dárejede jaraqattanyp, medıtsınalyq mekemege jetkizildi. Qazirgi tańda olardyń ómirine qaýip tónip turǵan joq, qajetti medıtsınalyq kómek kórsetilip jatyr, — dep habarlady Túrkistan oblysy Tótenshe jaǵdaılar departamenti.

Osyǵan baılanysty Túrkistan oblysynyń Tótenshe jaǵdaılar departamenti azamattardy, ásirese ata-analardy balalardyń qaýipsizdigine beıjaı qaramaýǵa shaqyrady.

— Pırotehnıkalyq buıymdar — oıynshyq emes, olardy paıdalaný kezinde belgilengen qaýipsizdik talaptaryn qatań saqtaý qajet. Pırotehnıkany kámeletke tolmaǵandardyń paıdalanýyna qatań tyıym salynady jáne ony tek eresekterdiń baqylaýymen jáne ashyq, qaýipsiz aýmaqta qoldaný qajet. Qoldanar aldynda nusqaýlyqty muqııat oqý mindetti. Úı jaǵdaıynda nemese adamdar kóp jınalǵan jerde paıdalanýǵa bolmaıdy, — delingen departament taratqan aqparatta.

Sonymen qatar, oblys kóleminde 20-31 jeltoqsan aralyǵynda «Pırotehnıka» aktsııasy ótkizilip jatyr.

Ákimshilik quqyq buzýshylyq týraly kodeksiniń 436-babyna sáıkes, eldi mekenderde pırotehnıka qoldanýǵa tyıym salynǵan. Eger bul áreketti 16 jasqa tolmaǵan bala jasasa, jaýapkershilik tolyǵymen ata-anaǵa júkteledi. Zań boıynsha mundaı áreket úshin pırotehnıka tárkilenip, 20 AEK mólsherinde aıyppul salynady.

Budan buryn Jańa jyl qarsańynda polıtsııa kúsheıtilgen rejımde jumys istep jatqanyn jazǵan edik.