Túrkistan oblysynda ótken «Móldir bulaq» aktsııasyna 1500 adam qatysty
TÚRKІSTAN. KAZINFORM – Jańarý kúnine oraı Túrkistan oblysynda «Móldir bulaq» ekologııalyq aktsııasy uıymdastyryldy. Igi shara Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» jalpyulttyq baǵdarlamasy aıasynda ótti.
Prezıdent Qasym-Jomart Toqaev halyqqa úndeý jarııalap, respýblıka aýmaǵynda «Móldir bulaq» ekologııalyq aktsııasyn bastaý týraly tapsyrma bergen bolatyn. Osyǵan sáıkes Túrkistan oblysynda aktsııa keń kólemde uıymdastyrylyp, oǵan óńir turǵyndary, memlekettik qyzmetkerler, eriktiler men jastar belsendi qatysty.
Naýryz merekesimen tuspa-tus kelgen ekologııalyq shara Naýryznama aıasyndaǵy Tazarý kúnine arnaldy. Osy kúni Túrkistan oblysynyń shyǵys qaqpasy sanalatyn Túlkibas aýdanynda tabıǵatty qorǵaýǵa baǵyttalǵan aýqymdy is-shara ótti.
Túlkibas óńiri Qarataý men Alataý jotalary túıisken aımaqta ornalasqan, tabıǵı bulaqtar men ózenderge baı óńir sanalady. Aýdanda jeti ózen bastaý alyp, júzge jýyq bulaq kózi halyq ıgiligine qyzmet etip keledi.
Ekologııalyq aktsııaǵa oblys ákimi Nuralhan Kósherov bastaǵan óńir basshylyǵy qatysyp, «Áýlıe bastaý» bulaǵynyń kózin tazartý jáne abattandyrý jumystary júrgizildi. Bulaq mańyna aǵash kóshetteri otyrǵyzylyp, aýmaq retke keltirildi.
Oblys ákimi Nuralhan Kósherov Memleket basshysy Úndeýinde aıtylǵan bastamalardyń mańyzdylyǵyna toqtalyp, bulaq kózderin saqtaý men tazartý jumystary júıeli túrde jalǵasatynyn aıtty.
– Memleket basshysy Qasym-Jomart Kemeluly úndeýinde respýblıka aýmaǵynda «Móldir bulaq» bastamasyn jappaı iske asyrý qolǵa alynǵanyn atap ótti. Bul joba aıasynda bulaqtardyń kózin ashý, tal egý, jaǵalaýlardy, saıabaqtar men aýlalardy tazalaý jumystary jalǵasady. Bul – bir kúndik aktsııa emes, bolashaq urpaqqa taza tabıǵat qaldyrýǵa baǵyttalǵan júıeli jumys. Sý tapshylyǵy barlyq óńirge ortaq másele. Sondyqtan bulaq kózderin saqtaý – barshamyzdyń mindetimiz. Búgingi aktsııaǵa oblys boıynsha 1500 adam qatysýda. Aldaǵy ýaqytta óńirdegi 1500-ge jýyq bulaqtyń kózin ashý josparlanyp otyr, – dedi Nuralhan Kósherov.
«Áýlıe bastaý» bulaǵy 1940 jyldan beri paıdalanylyp kele jatqan mańyzdy sý kózi. Ol Jylandy jáne Kókbulaq ózenderi arqyly Arys ózenine quıyp, birneshe eldi mekendi sýmen qamtamasyz etedi. Qazirgi ýaqytta bulaq sýy 45 gektar sýarmaly jerdi, 30 gektar egistikti jáne 120-dan astam turǵyn úıdi sýmen qamtyp otyr.
Jalpy Túlkibas aýdanynda 59 eldi mekenniń 49-y aýyz sýdy tabıǵı bulaq kózderinen paıdalanady. Sonymen qatar 111 kanal arqyly 13 832 gektar aýyl sharýashylyǵy jeri aǵyn sýmen qamtamasyz etilýde.
Aıta ketý kerek, «Móldir bulaq» ekologııalyq aktsııasy oblystyń barlyq aýdandarynda bir mezette uıymdastyrylyp, oǵan shamamen 1500 adam qatysty. Al «Taza Qazaqstan» baǵdarlamasy aıasynda óńir boıynsha 1,3 mıllıonǵa jýyq turǵyn qatysyp, 1 mıllıonnan astam aǵash kósheti otyrǵyzylǵan.
Aldaǵy ýaqytta bulaq kózderin saqtaý maqsatynda zamanaýı tásilder engizilip, sý kózderine QR-kod ornatý josparlanyp otyr. Bul bulaqtar týraly aqparat alýdy jeńildetip, turǵyndardyń ekologııalyq mádenıetin arttyrýǵa múmkindik beredi.
