Túrkistan oblysynda ósirilgen banandar mamyr aıynda satylymǵa shyǵady
TÚRKІSTAN. KAZINFORM - Saıram aýdanyna qarasty Qaınarbulaq aýyldyq okrýgindegi jylyjaı kesheninde banan ósirilip jatyr.
Seriktestik ıesi Islam Alıevtyń aıtýynsha, aldaǵy 2-3 apta kóleminde alǵashqy ónimniń dámin tatyp kórýge bolady.
Jalpy aýmaǵy 5,3 ga bolatyn jylyjaı túrkııalyq tehnologııalar negizinde salynǵan. Alǵashqyda aýmaqqa tájirıbe retinde banannyń «Anamýz» sortynyń 7400-den astam kósheti otyrǵyzylǵan. Tropıkalyq jemis aǵashynyń Saıram topyraǵyna jersinýi úshin qajetti tyńaıtqyshtar qoldanylǵan. Qazir munda 150 adam banandy baptap, ósirip jatyr. Al, sharýa 5 gektar jylyjaıdan 1000 tonna ónim alýdy josparlap otyr.
«Bul ónim Qazaqstannyń ishki naryǵyn qamtýǵa baǵyttalmaq. Ázirge baǵasyn belgilegen joqpyz. Negizinen shetelden keletin banan baǵasynan áldeqaıda arzan bolady. Sebebi, bizde jolǵa ketetin shyǵyn joq», - deıdi Islam Alıev.
Fermerlik jylyjaı kesheni 2023 jyldyń maýsym aıynda iske qosylǵan. Mundaǵy qural-jabdyqtardan bólek, agronom maman da Túrkııadan shaqyrtylǵan.
«Banan butaǵy 10-15 jylǵa deıin ónim berýge qaýqarly. Mamyr aıynda alǵashqy ónimdi alamyz, Sondaı-aq qazir banannan bólek, lımon, qurma tárizdi tropıkalyq jemisterdi de jersindirip jatyrmyz. Aldaǵy ýaqytta da jemis túrin kóbeıte beremiz», - deıdi sharýa.
