Túrkistan oblysynda órtten qaza bolǵan 12 adamdy jerleýge kómek beriledi
TÚRKІSTAN. KAZINFORM — Oblys ákimdigi tarapynan zardap shekkender men qaza tapqandardyń otbasylaryna barlyq qajetti medıtsınalyq, psıhologııalyq jáne áleýmettik kómek kórsetilip jatyr.
Sonymen birge marqumdardy jerleý rásimin uıymdastyrýǵa tolyqtaı qoldaý jasalady.
Túrkistan oblysynyń ákimi Nuralhan Kósherov Jetisaı aýdanyna shuǵyl baryp, órtten qaıtys bolǵan otbasynyń jaqyndaryna kóńil aıtty.
Oqıǵa bolǵan úıdi kórip, quzyrly organ basshylary men jaýapty tulǵalarǵa tıisti tapsyrmalar berdi. Aýdandyq aýrýhanaǵa baryp, órtten aman qalǵan turǵyndardyń jaı-kúıimen tanysty.
Óńir basshysy Prezıdent tapsyrmasymen úkimettik komıssııa qurylǵanyn, zardap shekkenderge tıisti kómekter beriletinin jetkizdi.
Búgin tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.
Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan.
Órtti barlaý jáne sóndirý barysynda úıdiń ishinen es-tússiz úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda barlyǵy 12 adamnyń denesi tabyldy.
Kórshilerdiń aıtýynsha, aldyńǵy kúni úı ıeleri is-shara ótkizgen, úıde qonaqtar bolǵan. Órt 360 sharshy metr aýmaqta tolyqtaı sóndirildi.
Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.
Órt faktisi boıynsha «Órt qaýipsizdigi talaptaryn buzý» babymen qylmystyq is qozǵaldy.
Órtten keıin medıtsınalyq mekemelerge úsh adam — eki eresek jáne bir bala jetkizildi. Vedomstvo aqparatyna sáıkes, qazir barlyǵy reanımatsııa bóliminde jatyr, jaǵdaılary aýyr, biraq turaqty.