Túrkistan oblysynda órtten kelgen shyǵyn 580 mln teńgeden asty
TÚRKІSTAN. KAZINFORM — Túrkistan oblysynda jyl basynan beri 219 órt tirkeldi. Bul týraly oblystyq TJD Memlekettik órt baqylaý basqarmasynyń bastyǵy Meıramhan Kemelhanov brıfıngte málimdedi.
Onyń aıtýynsha, jyl basynan beri bolǵan órt saldarynan 4 adam kóz jumyp, 6 adam jaraqattanǵan.
— Órtterdiń basym bóligi, ıaǵnı 111-i turǵyn úı sektorynda tirkeldi. Negizgi sebep — elektr quraldaryn montajdaý jáne paıdalaný talaptarynyń buzylýy. Osy sebepten 185 órt shyqty. Órtten kelgen materıaldyq shyǵyn kólemi 580 mln teńgeden asty. Bul ótken jyldyń sáıkes kezeńimen salystyrǵanda 30,6 paıyzǵa joǵary, — dedi Meıramhan Kemelhanov.
Spıkerdiń aıtýynsha, memlekettik órt baqylaýy aıasynda oblysta 51 708 nysan esepke alynǵan. Jyl basynan beri 1521 tekserý júrgizilgen.
— Tekserý barysynda 135 nysanda buryn berilgen nusqamalardyń oryndalmaǵany anyqtaldy. Sonyń negizinde Ákimshilik quqyq buzýshylyq týraly kodekstiń 462-baby boıynsha ákimshilik is qozǵalyp, sotqa joldandy. Nátıjesinde 113 nysanǵa jalpy 49 mln 638 myń teńge aıyppul salyndy. Taǵy 22 is sot qaraýynda jatyr. Jalpy 915 adamǵa qatysty ákimshilik is qaraldy. Onyń ishinde 597 azamatqa eskertý berilip, 318 adamǵa jalpy 23 mln 563 myń teńge aıyppul salyndy, — dep atap ótti Meıramhan Kemelhanov.
Sondaı-aq óńirde jyl basynan beri qatty turmystyq qaldyqtar polıgondarynda 30 órt tirkelgen. Osyǵan baılanysty kináli tulǵalarǵa jalpy 8 mln 878 myń teńge aıyppul salynǵan.
Buǵan deıin Túrkistan oblysynda balabaqsha ǵımaraty órtengenin jazǵan edik.
