Túrkistan oblysynda Ortalyq Azııadaǵy eń iri bordaqylaý kesheni ashyldy
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın Túrkistan oblysynyń Qojatoǵaı aýyldyq okrýginde jańa bordaqylaý kesheniniń ashylý rásimine qatysty. Jylyna 50 myń basqa deıin iri qara mal bordaqylaýǵa qaýqarly nysan — Ortalyq Azııadaǵy eń iri keshen.
Joba «Qaıyp Ata» kompanııalar tobyna kiretin «Túrkistan Agro KZ» JShS tarapynan júzege asyryldy. Keshen jemshóp daqyldaryn ósirýden bastap mal bordaqylaý, soıý, etti óńdeý jáne daıyn ónimdi ótkizýge deıingi tolyq óndiristik tsıkldi qamtıdy.
Jańa keshen jylyna 15 myń tonnaǵa deıin et óndirýge múmkindik beredi. Kompanııalar tobynyń quramynda jylyna 7,2 myń tonna ónim shyǵaratyn et óńdeý kásiporny men qýattylyǵy 46 myń tonnalyq quramajem zaýyty jumys isteıdi. Sonymen qatar 1,4 myń gektar alqapta jańbyrlatyp sýarý tehnologııasyn qoldana otyryp, jemshóp daqyldaryn ósirý jáne 12 myń bas malǵa arnalǵan zamanaýı mal bırjasyn salý jobalary júzege asyrylýda.
Bordaqylaý keshenin salý barysynda Aýstralııa tehnologııalary qoldanyldy. 2024 jyldan bastap Qazaqstanda etti mal sharýashylyǵyn damytýdyń aýstralııalyq modeliniń jekelegen elementterin engizý jumystary júrgizilip keledi. Bul tásil mal ónimdiligin arttyrýǵa, óndiris shyǵyndaryn azaıtýǵa, bordaqylaý alańdary men mal saýdasynyń zamanaýı ınfraqurylymyn damytýǵa baǵyttalǵan.
— Búgin biz Ortalyq Azııadaǵy eń iri bordaqylaý keshenderiniń birin ashyp otyrmyz. Úsh jyl buryn qazaqstandyq fermerlermen birge Aýstralııaǵa baryp, mal sharýashylyǵyn júrgizýdiń ozyq tájirıbesin zerdeledik. Búginde sol tájirıbeniń is júzinde qoldanylyp jatqanyn kórip otyrmyz. Qazaqstanda bul salany odan ári damytýǵa barlyq múmkindik bar. Atap aıtqanda, keń jaıylymdyq alqaptar, jemshóp qory, bilikti mamandar jáne eksporttyq áleýet jetkilikti. Byltyr et eksporty 100 myń tonnadan asty. Alaıda bul — elimizdiń áleýeti tolyq paıdalanyldy degen sóz emes. Qazir agroónerkásip kesheniniń eldiń jalpy ishki ónimindegi úlesi shamamen 6%-dy quraıdy. Mal sharýashylyǵyn damytý, óndiris kólemin ulǵaıtý jáne aýyl sharýashylyǵy ónimderin tereń óńdeý ekonomıkalyq ósimniń qosymsha kózderine aınalýǵa tıis. Aldaǵy ýaqytta agroónerkásip kesheniniń jalpy ishki ónimdegi úlesin 10%-ǵa jetkizý mindetin qoıyp otyrmyz, — dedi Premer-mınıstrdiń orynbasary — ulttyq ekonomıka mınıstri.