Túrkistan oblysynda onkologııalyq aýrýǵa shaldyǵýshylar kóbeıgen

TÚRKІSTAN. KAZINFORM – Keıingi 5 jylda óńirde onkologııalyq aýrýlardyń jańadan anyqtalýy 21,6 paıyzǵa ósip otyr. 

Aýrýshańdyq ásirese Lengir men Arys qalasynda jáne Báıdibek, Ordabasy, Otyrar aýdandarynda joǵarǵy kórsetkishke ıe. Kentaý qalasynda ótken jyly 85 naýqas «D» esepke alynǵan. 2020 jylmen salystyrǵanda kórsetkish 56,2 paıyzǵa joǵary.

Dárigerlerdiń sózine súıensek, qaladaǵy halyq sanynyń azaıýyna baılanysty jańadan anyqtalǵan naýqastardyń sany tómendep, kórsetkishi joǵarylaǵan.

Túrkistan qalasynda 41 sút bezi qaterli isigi, 24 asqazan qaterli isigi, 23 jatyr moıny qaterli isigi, 22 ókpe qaterli isigi, 19 teriniń qaterli isigi tirkelgen. Al, onkologııalyq aýrýdan 5 jyl ishinde óńirde 4234 adam qaıtys boldy. Atap aıtar bolsaq, 2020 jyly 943, 2021 jyly 930, 2022 jyly 879, 2023 jyly 810, 2024 jyly 672 adam dúnıeden ótken.

Dárigerler onkologııalyq aýrýlardyń aldyn alýdyń eń tıimdi joly skrınıngtik jáne profılaktıkalyq tekserýlermen halyqty tolyqtaı qamtý ekendigin aıtyp otyr. 

— Onkologııalyq aýrýlar boıynsha jyldan jylǵa ósim baıqalady. Ósý barysy birinshi, ekinshi deıgeı bolsa, ol ýaqytyly anyqtalyp jatyr degen sóz. Bul jaǵdaıda naýqasty emdeýge, jasyn uzartýǵa bolady. Al, anyqtalmaı, ólim kórsetkishi ósip, aýrýshylar tómendese — bul óte qaýipti. Sondyqtan, ólim kórsetkishiniń tómendep, naýqastanýshylardyń kóp anyqtalýyna mán berý kerek, - dedi Túrkistan oblystyq densaýlyq saqtaý basqarmasynyń basshynyń orynbasary Baýyrjan Satybaldy. 

Aıta keteıik, budan buryn Eýropada qyzylshamen aýyrǵandar sany rekordtyq deńgeıge jetkenin jazǵan bolatynbyz.