Túrkistan oblysynda oqýshy mobıldi qosymsha men qazaqsha sóıleıtin robot qurastyrdy
TÚRKІSTAN. KAZINFORM - Saryǵash aýdanynda 10-synyp oqýshysy JARIQ jasandy ıntellekt mobıldi qosymshasyn jasap, tabysqa qol jetkize bastady.
«Otyrar» arnasynyń jazýynsha, 10-synyp oqýshysy Janserik Kamal jasaǵan baǵdarlama dybystyq habarlamany 100-den asa tilde jazbasha mátinge aınaldyra alady. Sonymen qatar, saýaldarǵa jaýap beredi. Jasóspirim tyń jobasymen respýblıkalyq baıqaýda top jardy. Jas ǵalym oılap tapqan mobıldik qosymshany búginde Google Play Market-ten júktep, 150-ge tarta adam qoldanýda.
«Qazir „Jaryqty“ kóptegen adam qoldanady. Bul qosymshanyń negizgi maqsaty — adamdardyń ýaqytyn únemdeý. Meniń baqylaýym boıynsha muny kóp oqýshylar paıdalanady. Kúndelikti ómirde qosymsha aqparattar, kitaptar izdeý barysynda paıdalanatynyn baqylap otyramyn. Mende tolyq statıstıkasy bar. Eger oqýǵa erinseńiz, qysqasha málimet te usynady», — deıdi Saryaǵash aýdany № 4 mamandandyrylǵan «Daryn» mektep-ınternatynyń 10-synyp oqýshysy Janserik Kamal.
Mobıldi qosymsha oqýshynyń alǵashqy jobasy emes. Janserik demalys oryndaryna kelgen qonaqtarǵa sýsyn jetkizýshi «Qolqanat» robotynyń maketin jasap shyǵarǵan. Aqyldy robot apparattyq jáne baǵdarlamalyq jasaqtamadan turatyn arnaıy platforma arqyly jasalǵan. Ol dybys jazatyn saıt arqyly qazaq tilinde sóıleı alady.
«Bul robottyń ereksheligi — qonaq úı, meıramhanalarda kelgen adamdarǵa sýsyn usynyp, olarmen sóılesip, kóńil-kúıin kóterýge qosymsha bir element retinde qarastyrylady. Sonymen qatar, sheteldik týrısterge Qazaqstan týraly jaǵymdy emotsııa qaldyrady dep sanaımyn», — dedi jas ǵalym.
Daryndy jasóspirim ótken jyly «Saryaǵash týrızm» qosymshasyn iske qosty. Kýrorttyq aımaq týraly tolyqqandy aqparat usynatyn qosymshany búginde 300-den asa adam qoldanady. Respýblıkalyq konkýrsta júldeli oryn ıelengen jobaǵa qyzyǵýshylyq tanytqandar da joq emes.
15 jastaǵy saryaǵashtyq jas ǵalym qazir ózi syndy oqýshylarǵa ıntelektýaldy oıyn jasaýdy qolǵa alǵan. Janseriktiń aldaǵy maqsaty — ǵylym men tehnıkanyń tylsym tustaryn barynsha tereń meńgerý. Oqýshynyń bul baǵytta alǵa qoıǵan maqsattary da tolaǵaı.
