Túrkistan oblysynda nóserden keıin birneshe aýyldy sý basty
TÚRKІSTAN. KAZINFORM – Túrkistan oblysynyń Qazyǵurt aýdanynda nóser jaýyn saldarynan birneshe eldimekende kósheler men aýlalarǵa sý kirdi.
Áleýmettik jelide taraǵan vıdeolardan aýyldardy jalǵaıtyn joldar men eldimeken kóshelerine sý jaıylǵanyn kórýge bolady. Kólkigen sý jaıaý júrginshiler men kólik júrgizýshilerine qolaısyzdyq týǵyzǵan.
Túrkistan oblystyq tótenshe jaǵdaılar departamentiniń málimetinshe, 1 qazanda Aqbastaý aýylynda jaýyn-shashyn saldarynan kóshelerge jáne turǵyn úılerdiń jertólelerine sý jınalǵan. Sondaı-aq taýly aımaqtaǵy jaýyn sýy tómen qaraı aǵyp, Qosaǵash, Qyzylseńgir jáne Turbat aýyldaryna jetken.
Qazyǵurt aýdany ákimdiginiń habarlaýynsha, sel júrgen aýmaqtarda jergilikti atqarýshy organdar men tótenshe jaǵdaı qyzmetkerleri tıisti jumystar júrgizip jatyr.
— Oqıǵa oryndaryna 9 arnaıy tehnıka, 64 adam jumyldyryldy. Qazir sel saldaryn joıý, aýmaqtardy tazartý jáne turǵyndardyń qaýipsizdigin qamtamasyz etý sharalary júrgizilip jatyr, — dep habarlady aýdan ákimdiginiń baspasóz qyzmeti.
Aldyn ala málimet boıynsha, adam shyǵyny men turǵyn úılerdiń qıraýy tirkelmegen. Jaǵdaı jaýapty sala mamandarynyń turaqty baqylaýynda.
Buǵan deıin «Qazgıdromet» boljamyna sáıkes, 1 qazanda jańbyr jaýyp, kún sýytatyny habarlanǵan edi.
