Túrkistan oblysynda nóserden kelgen shyǵyn ótele me
TÚRKІSTAN. KAZINFORM – Túrkistan oblysynyń Tólebı jáne Qazyǵurt aýdandarynda nóser jaýyn saldarynan birneshe turǵyn úı aýlasy men baspanalardy sý basyp, turǵyndarǵa qıyndyq týǵyzdy.
Oblystyq tótenshe jaǵdaılar departamentiniń málimetinshe, Tólebı aýdanynda 3 turǵyn úıdiń aýlasy men 1 jeke turǵyn úıge, al Qazyǵurt aýdanynda 78 turǵyn úı aýlasy jáne 7 jeke turǵyn úıdiń aýlasyna jańbyr sýy kirgen.
Qazyǵurt aýdanyndaǵy Qydyr Mámbetuly aýylynyń turǵyny Nursultan Daýylbaevtyń aıtýynsha, baspanasyna sý kirip, basqa úıge kóshýge májbúr bolǵan.
– Bizdiń aýylda nóser jaýynnan keıin sý basý jaǵdaıy jıi bolady. Eń qaýiptisi sońǵy ret 2019 jyly bolǵan edi. Bıylǵysy tipti qıynǵa soqty. Aýyldaǵy 14 úıdiń aýlasyn sý basty. Úıimniń úsh jaǵyndaǵy qorǵany qulap, otyrǵan úıimizge sý kirdi. Amalsyz áli tolyq bitpegen úıge kóshýge týra keldi. Onyń da qabyrǵasy jarylyp, irgetasyna zaqym keldi. Shyǵyn az emes, – dedi ol.
Oblys ákimdiginiń habarlaýynsha, qazirgi tańda jaýyn-shashyn toqtap, jaǵdaı turaqtalǵan. Atalǵan aýmaqtarda sýdy burý jáne sý tasqynynyń aldyn alý baǵytynda jedel jumystar júrgizilip jatyr.
Apat saldaryn joıýǵa 100-den astam adam, 20-ǵa jýyq tehnıka jáne 14 motopompa jumyldyrylǵan. Arnaıy jumysshy toptar kúsheıtilgen rejımde jumys istep jatyr.
– Shyǵyn anyqtalǵan jaǵdaıda, ony demeýshiler esebinen óteý máselesi ákimdik tarapynan qarastyrylady, – delingen vedomsto taratqan aqparatta.
Oblys ákiminiń birinshi orynbasary Zulpyhar Joldasov Qazyǵurt aýdanyna baryp, ahýaldy baqylap, jaýapty tulǵalarǵa naqty tapsyrmalar júktedi.
Aımaqtaǵy sý nysandary men ózen-kólderdiń jaǵdaıy turaqty baqylaýda. Jergilikti atqarýshy organdar men tótenshe jaǵdaılar qyzmeti jaǵdaıdy tolyq baqylaýǵa alǵan.
Budan buryn Túrkistan oblysynda nóser saldarynan kópirlerdi sý shaıyp, 81 adam evakýatsııalanǵanyn jazǵan edik.
