Túrkistan oblysynda nómirin jasyryp júrgen júrgizýshiniń qýlyǵy áshkerelendi
TÚRKІSTAN. KAZINFORM — Túrkistan oblysynda kóliginiń memlekettik tirkeý nómirin arnaıy qurylǵy arqyly jasyryp júrgen júrgizýshi polıtseılerge ustaldy.
Túrkistan oblysynda polıtseıler memlekettik tirkeý nómirin qasaqana búrkemelep, jol qozǵalysy erejesin buzǵan júrgizýshini anyqtap, zań aıasynda jaýapkershilikke tartty.
Tártip saqshylary respýblıkalyq mańyzy bar Shymkent — Samara avtojolynda jyldamdyq pen ýaqytty ólsheıtin beınebaqylaý júıesinen kelip túsken baǵyttama negizinde Túrkistan qalasyna baǵyt alǵan Toyota Camry avtokóligin toqtatqan.
— Tekserý barysynda kóliktiń memlekettik tirkeý nómirine arnaıy qoldan ashylyp-jabylatyn tetik ornatylǵany anyqtaldy. Júrgizýshi bul qurylǵymen nómirdi qajet kezinde jasyryp, beınebaqylaý kameralaryna túspeý jáne jaýapkershilikten jaltarý maqsatynda paıdalanǵan, — dep habarlady oblystyq polıtsııa departamenti.
Quqyq buzýshylyq deregi boıynsha avtokólik aıyp turaǵyna qoıylyp, júrgizýshige qatysty ákimshilik shara qoldanyldy.
Buǵan deıin Túrkistan oblysynda bir táýlikte nómirsiz júrgen 50-ge jýyq kólik anyqtalǵany týraly jazǵan edik.
