Túrkistan oblysynda neırohırýrgter 3 aılyq sábıge kúrdeli ota jasady

TÚRKІSTAN. KAZINFORM – Túrkistan oblystyq balalar aýrýhanasynyń neırohırýrg-dárigerleri medavıatsııa jelisi arqyly Saryaǵash aýdanyna baryp, mıyna qan quıylǵan 3 aılyq sábıge shuǵyl túrde mamandandyrylǵan kómek kórsetti.

Aýdandyq ortalyq aýrýhanada nárestege shuǵyl túrde magnıtti-rezonansty tomografııa (MRT) jasalyp, zertteý nátıjesinde mı ishine qan quıylǵany anyqtaldy. Dárigerler konsılıýmy jedel túrde ota jasaý týraly sheshim qabyldady.

– Neırohırýrgtar júrgizgen mı qýysyna syrtqy drenaj ornatý operatsııasy sátti ótti. Ota barysynda trepanatsııa jasalyp, arnaıy tútikshe arqyly 3-4 ml kólemindegi qan jınalǵan aımaq tolyq tazartyldy. Bir aptadan keıin náreste Saryaǵash aýdandyq ortalyq aýrýhanasynan Túrkistan oblystyq balalar aýrýhanasyna aýystyryldy. Qazir onyń jaǵdaıy turaqty, qajet baqylaý men emdi alyp jatyr, - delingen oblystyq Densaýlyq saqtaý basqarmasy taratqan aqparatta.

Mamandardyń aıtýynsha, der kezinde hırýrgııalyq kómek kórsetilmegen jaǵdaıda balanyń jaǵdaıy mıishilik gıdrotsefalııaǵa, qannyń irińdep asqynýyna jáne basqa da aýyr saldarǵa ákelýi múmkin edi.

Aldaǵy ýaqytta sábıge kompıýterlik tomografııa (KT) túsirilip, jaǵdaıyna qaraı tútiksheni alyp tastaý nemese qosymsha ota jasaý múmkindigi qarastyrylmaq.

Budan buryn Túrkistanda ekinshi ret baýyr transplantatsııasy sátti ótkenin jazǵan edik.