Túrkistan oblysynda NEET sanatyndaǵy jastar 1 mln teńge grant ala alady

TÚRKІSTAN. KAZINFORM - «Zhas project» jobasy aıasynda NEET sanatyndaǵy jastarǵa 1 mıllıon teńge grant beriledi. Bul týraly brıfıngte Túrkistan oblysy qoǵamdyq damý basqarmasy «Jastar resýrstyq ortalyǵy» KMM-i basshysynyń orynbasary Perdebek Esqulov málimdedi.

«Zhas Project» jobasyna - jumyssyz bolyp tirkelgen, múgedektigi bar, sondaı-aq joǵary bilimi joq 21-35 jas aralyǵyndaǵy jastar qatysa alady. Baıqaý jeńimpazdaryna qarajat qolǵa berilmeıdi, tek kásipke qajetti qural-jabdyqpen qamtıtyn mekemeniń shotyna aýdarylmaq. Óńir boıynsha 19 naýryz jáne 25 sáýir aralyǵynda joba úlgileri qabyldanyp, jeńimpazdar 20 mamyr kúni anyqtalady.

«Túrkistan oblysynda jastar saıasatyn damytý jáne jumyssyzdyqty azaıtý maqsatynda memleket tarapynan qaıtarymsyz granttar bólinip jatyr. Odan bólek, NEET sanatyndaǵy jastar úlesin tómendetý men aýyl jastaryn qoldaý máseleleri de qarastyrylǵan. Osy rette bıyl «Zhas Project» jobasy aıasynda NEET sanatyna jatatyn jastarǵa óz jobasyn júzege asyrýǵa 1 mln teńge beriledi. Baıqaý aıasynda 20 jas jeńimpaz atanbaq. Odan bólek, «2021-2025 jyldary kásipkerlikti qoldaýǵa arnalǵan Ulttyq joba» aıasynda 621 jasqa 2,5 paıyzben 5 mln teńgege deıin nesıe beriletin bolady», - dedi Perdebek Serjanuly.

Aıta ketsek, ótken jyly Túrkistan oblysy boıynsha jobaǵa 143 ótinim túsip, nátıjesinde 20 joba grant ıegeri atandy. Odan bólek, «2021-2025 jyldary kásipkerlikti qoldaýǵa arnalǵan Ulttyq jobasy» aıasynda 625 jasqa 2,5 paıyzben 5 mln teńgege deıingi nesıe berildi.