Túrkistan oblysynda naýryz meıramy 10 kún boıy toılanady
TÚRKІSTAN. KAZINFORM — Túrkistan oblysy men Shymkent qalasynyń turǵyndary kórisý kúnin birge atap ótedi.
«14 naýryz — «Kórisý kúni» — amal merekesi» bıyl Ordabasy aýdany, Temirlan aýylyndaǵy «Shámshi» alleıasynda uıymdastyrylady. Onda Túrkistan oblysy men Shymkent qalasy turǵyndarynyń kórisý rásimi ótedi. Atalǵan sharada qos óńirdiń zııaly qaýym ókilderi, ardagerler, etnos ókilderi men ónerpazdary kezdesip, kórisý kúni oryndalatyn barlyq rásimdi birlese atqaratyn bolady.
Sondaı-aq, osy kúni «Naýryz — jaqsylyqtyń jarshysy» ataýymen oblystyq chellenj bastaý alady.
Al, 15 naýryz – «Qaıyrymdylyq» kúni retinde atalyp ótpek. Bul kúni aýdan-qalalarda, aýyldarda jaǵdaıy tómen otbasylarǵa, múmkindigi shekteýli azamattarǵa kómek kórsetiledi jáne qoǵamnyń osal toptaryna, soǵys, eńbek ardagerlerine, batyr analarǵa arnaıy syılyqtar tapsyrylady.
16 naýryz kúni «Shańyraq», 17 naýryz — «Mádenıet jáne ulttyq salt-dástúr kúni», 18 naýryz — «Ulttyq kıim kúni», 19 naýryz «Jańarý kúni» retinde atalyp ótedi.
Árbir kún aıasynda kontserttik baǵdarlamalar men túrli is-sharalar uıymdastyrylady.
Al, 21 naýryz «Qosh keldiń — Áz Naýryz!» degen ataýmen Túrkistan qalasyndaǵy «Kerýen» saraıy aýmaǵynda merekelik saltanatty is-shara josparlanyp otyr.
Sondaı-aq, osy kúni qazaq estrada juldyzdarynyń qatysýymen «Án men ánshi Túrkistan tórinde» kontserttik baǵdarlamasymen qorytyndylanady.
— 22 naýryz «Jyl basy» kúni Túrkistan qalasy men barlyq aýdan-qaladaǵy ortalyq alańdar men saıabaqtarda kórmeler, kontserttik baǵdarlamalar, ulttyq sporttyq oıyndar mereke kórkin qyzdyrady. Sondaı-aq, «Kongress holl» kesheninde Respýblıkalyq aqyndar aıtysy, Túrkistan mýzykalyq drama teatrynda 2 kún boıy «Vals koroli» qoıylymy kórermen nazaryna usynylady. Al 23 naýryz «Tazarý» kúni — oblys kóleminde jalpyhalyqtyq senbilik uıymdastyrylyp, aýdandar men qalalarda tazalyq jumystary júrgiziledi, — dedi Ázimhan Qoılybaev.
Aıta keteıik, budan buryn Túrkistan oblysynda bata berý jáne jarapazan aıtýdan jarys ótetindigin jazǵan bolatynbyz.