Túrkistan oblysynda naýryz meıramy 10 kún boıy toılanady
TÚRKІSTAN.KAZINFORM — Túrkistan oblysynda bıyl Naýryz meıramyn 10 kún boıy toılaý josparlanyp otyr. Bul týraly brıfıngte Túrkistan oblysy mádenıet jáne týrızm basqarmasynyń basshysy Ázimhan Qoılybaev málimdedi.
«Onyń aıtýynsha, bul halqymyzdyń ejelden kele jatqan ata dástúri. 14-23 naýryz kúnderi arylyǵynda «Kórisý kúni — amal merekesi», «Meıirimdilik merekesi» syndy ataýly kúnderi túrli sharalar ótedi.
«14 naýryz — «Kórisý kúni — amal merekesi» kúni óńirdegi belgili óner, sport salasyndaǵy qaıratkerler aǵa býynnyń shańyraqtaryna arnaıy baryp, jyldyń bastalýymen quttyqtaıdy. Amandandyq surasyp, kórisedi. Sondaı-aq, osy kúni «Naýryz — jaqsylyqtyń jarshysy» ataýymen oblystyq chellenj uıymdastyrylady. Al 15 naýryz kúni «Naýryz — meıirimdilik merekesi» retinde atalyp ótpek. Bul kúni aýdan-qalalarda, aýyldarda jaǵdaıy tómen otbasylarǵa, múmkindigi shekteýli azamattarǵa kómek kórsetý maqsatynda qaıyrymdylyq aktsııasy ótedi. Sondaı-aq, soǵys, eńbek ardagerlerine, Batyr analarǵa qurmet kórsetý maqsatynda Aǵa urpaqty qasterleıik» aktsııasy qolǵa alynady» — dedi basqarma basshysy.
Sonymen qatar, 15 naýryz kúni — Túrkistan qalasyndaǵy «Kongress holl» kesheninde oblys ákimdigi men aıtys aqyndary jáne jyrshy-termeshilerdiń Halyqaralyq odaǵynyń uıymdastyrýymen Túrkistan oblysy men Jambyl oblysy aqyndary, termeshi-jyrshylary arasyndaǵy komandalyq óner dodasy uıymdastyrylady.
Bul týraly brıfıngte «Aıtys aqyndary men jyrshy-termeshilerdiń Halyqaralyq Odaǵynyń» Túrkistan oblysyndaǵy fılıal tóraǵasy Turar Tileýlıev aıtty.
«16 naýryz kúni «Naýryz — salt-dástúrdiń jańǵyrýy» degen bastamamen oblystaǵy barlyq mádenıet mekemelerinde ulttyq salt-dástúrlerdi jańǵyrtatyn sahnalyq kórinister ótedi. Al 17 naýryz kúni «Naýryz — tárbıeniń bastaýy» degen ataýmen barlyq mektepterde merekelik is-sharalar, qolóner sheberleri men sýretshilerdiń kórmeleri uıymdastyrylady. Sondaı-aq, jaǵdaıy tómen otbasylardyń balalaryna, múmkindigi shekteýli balalarǵa kómek kórsetilmek. 18 naýryz — «Túrkistan — Túrki áleminiń týrıstik astanasy» degen atpen 09:00–den bastap Túrkistan oblysynyń memlekettik qyzmetshileri ulttyq kıim kııý chellenjin bastaıdy. Sonymen qatar, 18 naýryz kúni «Túrkistan — túrki áleminiń týrıstik astanasy» atanýynyń resmı ashylý saltanaty «Kerýen saraı» aýmaǵynda ótedi», — dedi Ázimhan Serikuly.
Brıfıngke qatysqan Túrkistan oblysy mádenıet jáne halyq shyǵarmashylyǵy ortalyǵynyń dırektory Meıirjan Alıakbarov 19 naýryz kúni — «Naýryz — jańarý men jańǵyrýdyń, tatýlyqtyń bastaýy» degen atpen barlyq óńirlerde aǵash egý dástúri qolǵa alynatynyn aıtty. Bul kúngi merekelik is-sharalar «Naýryz bata» dástúrimen qorytyndylanady.
«20 naýryz — «Ulttyq sportty ulyqtaý» kúninde barlyq óńirlerdegi sport keshenderi men atshabarlarda ulttyq sport túrlerinen jarystar ótedi. Al 21 naýryz «Qosh keldiń — Áz Naýryz!» degen ataýmen Túrkistan qalasyndaǵy «Kerýen» saraıy aýmaǵynda oblys ákiminiń qatysýymen merekelik saltanatty is-shara josparlanyp otyr. 22 naýryz «Ulystyń uly kúni — Áz Naýryz» kúni Túrkistan qalasy men barlyq aýdan-qalalardaǵy ortalyq alańdar men saıabaqtarda kórmeler, kontserttik baǵdarlamalar, ulttyq sporttyq oıyndar mereke kórkin qyzdyrady. Al 23 naýryz «Naýryz — tazalyqtyń aınasy» kúni oblys kóleminde jalpy halyqtyq senbilik uıymdastyrylyp, aýdandar men qalalarda tazalyq jumystary júrgiziledi», — dedi Meıirjan Nurǵalıuly.
