Túrkistan oblysynda naýqastar emdelip jatqan kezde aýrýhanada jóndeý júrgizilgen
TÚRKІSTAN. KAZINFORM – Maqtaaral aýdanyndaǵy Myrzakent aýrýhanasynda naýqastar em alyp jatqan kezde jóndeý jáne syrlaý jumystary júrgizilgeni týraly áleýmettik jelide aqparat tarady.
Jeli qoldanýshylary qurylys jumystary men boıaýdyń ótkir ıisi patsıentterdiń densaýlyǵyna áser etýi múmkin ekenin aıtyp, aýrýhanadaǵy jaǵdaıǵa alańdaǵan.
Osyǵan baılanysty Túrkistan oblysynyń densaýlyq saqtaý basqarmasy túsinik berdi.
Basqarmanyń málimetinshe, 2026 jylǵy 7 qyrkúıekte aýrýhananyń terapııa bóliminde naýqastar sanynyń az bolýyna baılanysty kúndizgi ýaqytta aǵymdaǵy jóndeý jumystary júrgizilgen.
– Jóndeý barysynda bólimsheniń dálizi men esikterin syrlaý jumystary atqaryldy. Jumystar júrgizilgen ýaqytta naýqastardyń qaýipsizdigi men jaılylyǵyn qamtamasyz etý maqsatynda olar ýaqytsha basqa bólimshege ornalastyryldy, – dep habarlady oblystyq densaýlyq saqtaý basqarmasy.
Vedomstvonyń habarlaýynsha, jóndeý jumystary aıaqtalǵannan keıin terapııa bólimi shtattyq rejımde jumysyn jalǵastyrǵan. Patsıentter tarapynan jóndeý jumystaryna baılanysty shaǵym túspegen.
– Aýrýhanada jóndeý jáne abattandyrý jumystary sanıtarııalyq talaptar men patsıentterdiń qaýipsizdigin saqtaı otyryp júrgiziledi, – delingen basqarma habarlamasynda.
Buǵan deıin Túrkistan oblysynda jedel járdem qyzmetkerleriniń jol jóndep júrgenin habarlaǵan edik.
